KUCHING: Dawa bekaul bechiping entara raban bansa enggau pengarap ba pengawa ngagihka bantu pengerami di Sarawak enda patut lalu enda mandangka realiti komuniti nengeri tu.

Sapit Premier Sarawak, Datuk Amar Douglas Uggah Embas madah, Perintah Sarawak semampai ngemeran inisiatif inklusif nengah pengawa ngagihka bantu nitih peminta enggau tetiap komuniti nadai ngira tirai juru raban bansa tauka pengarap.

Ku iya, isu nya nyadi pengudah iya meri 16 iku chapi serimbai Hari Raya Aidiladha ti udah nya dipetalat raban bekaul.

“Aku madah ngagai sida nya endur aku empu, aku meri manggai 200 nyentuk 300 iku babi ngambi ditupi peranak dia tang ibadah korban ukai dikereja nengah chara nya.

“Sida ti mantai ke pekara nya kebendar enda mereti ke pekara ti nyadi laban ba kami, nyaup semua rayat nya dikemerat.

“Kami bisi chunto teladan iya nya Premier Sarawak, nya kebuah kami nitih ke inisiatif, polisi, atur pengawa enggau program iya laban semua nya meri pemaik ngagai rayat,” ku iya.

Iya madah munyi nya maya dirandau pemberita ba Pengerami Nerima Pengabang Gawai Dayak 2026 ti dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Unit Pekara Pengarap Bukai (UNIFOR), kena Hari Satu.

Berebak enggau nya, iya ngelalau semua raban ngambi enda nyebut sentimen raban bansa tauka pengarap ti ulih ngeruga pengelantang nengeri, tang begulai meri sadang penemu enggau bela ransing ngemansang Sarawak.

Iya madah baru, pemujur Sarawak sehari tu asil kerejasama rat rayat pupu bansa ti semampai ngemerat penyerakup enggau bela bebasa ke pangan diri. - EDISI UKAS

Pemberita : Ahmad Daniel Faiz
Gambar: Ibanez Jeffery