KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg bisi ngabang ke rumah ex-Sapit Kepala Menteri Sarawak Datuk Patinggi Tan Sri (Dr) Alfred Jabu Numpang serimbai Pengerami Gawai Dayak kena Hari Satu.

Penatai iya urung pukul 12 tengah hari diambat sida Datuk Patinggi Tan Sri Alfred Jabu sebilik.

Iya mega udah ngena awak pengelama sejam setengah berandau sereta makai pemakai begulai enggau tokoh veteran politik Sarawak nya ti mega entara Sapit Kepala Menteri ti lama mangku pengawa nya kenyau ari taun 1974 sebedau ninggalka dunya politik ba taun 2016.

Maya dirandau pemberita, Datuk Patinggi Alfred Jabu madah, budaya ngabang maya musin pengerami baka Gawai Dayak, Hari Raya Aidilfitri enggau Taun Baru China mandangka pengelurus rayat Sarawak narak penyerakup entara raban bansa.

Ku iya, semangat idup begulai ti dipandang nengah konsep “Segulai Sejalai” ukai semina nyadi chara rayat Sarawak, tang mega diatu diterima nyadi chunto penyerakup ti manah ba renggat nasional.

“Diatu mih awak ti engkeman, kelebih agi maya musin pengerami baka Gawai Dayak dikena mai rebak biak begulai ngambi sida ulih ngelala kaban belayan diri.

“Kitai mega bisi bakih ti datai ari Pulau Pinang enggau endur bukai di Malaysia dikena ngerami Gawai ditu ke alai sida ukai semina ngabang ke rumah aku enggau kami sebilik, tang mega ngabang ngagai bakih bukai.

“Tu pekara ti chukup manah lalu patut dikemegah kitai,” ku iya.

Ngenang pemansang nengeri, iya muji pemintar Premier Sarawak ti ditemu chukup siru ke rayat, kemerah enggau bisi perambu timpuh panjai ti nyengenda ungkup pemansang nengeri.

Ku iya, Perintah Sarawak diatu meri perati ngagai pengawa ngedut takah pemansang mengeri enggau menua pesisir nengah bemacham iniisatif nyengkaum nyendia pelajar tinggi nadai bebayar ba institusyen enggi nengeri sereta pemansang infrastruktur menua pesisir.

Bela datai, anak Premier Sarawak, Dayang Norjihan Datuk Patinggi Tan Sri (Dr) Abang Abdul Rahman Zohari, Sapit Menteri Besai Datuk Amar Fadillah Yusof, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala menteri enggau sapit menteri kabinet Sarawak, tuai opis sereta temuai dipebasa bukai. - EDISI UKAS

Pemberita : Ahmad Daniel Faiz
Gambar: Muhd Zulfadhli Ahmad Sharir