KUCHING: Lebih ari 2,000 rakyat di Kuching ngerichah Pengerami Nerima Pengabang Gawai Dayak 2026 ti diatur di Kompleks Unit Pekara Pengarap Bukai (UNIFOR) kena Hari Satu.

Sapit Premier Sarawak, Datuk Amar Douglas Uggah Embas madah ke timbal ti diterima taun tu ngelui ari taga tumu raban pengatur seraya mandangka semangat beserakup sereta pengelantang ti nyadi peneguh komuniti Sarawak.

“Tu mandangka Sarawak tu nengeri pemadu lantang ke alai pengelantang pupu bansa enggau pengarap dikembuan kitai mar dialah ke ba dini-dini endur bukai.

“Nya kebuah, tu mih ti meseti terus ditempa, dijaga enggau diibun kitai laban nengah pemisi pengelantang raban bansa enggau pengarap tu, Premier Sarawak ulih meri perati ngagai pengawa ngemansang Sarawak,” ku iya.

Iya madah munyi nya maya dirandau pemberita ba pengerami nya ti dipenyadi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Datuk Amar Douglas Uggah ti mega Menteri Infrastruktur enggau Pemansang Penyangkai Kapal Sarawak mega ngelalau rayat terus seati lalu begulai meri sadang penemu sereta sukung ngagai perintah nentuka Sarawak majak mansang nyadi nengeri chunto di Malaysia enggau rantau Asia.

Ngenang silik bekaul Pengerami Gawai Dayak, iya madah ke Pengerami Gawai Dayak Renggat Sarawak 2026 deka diatur kena 21 June tu seraya Niti Daun deka diatur kena 20 June tu.

Ku iya, pengerami nya disadang richah agi enngah penatai Yang di-Pertua Negeri Sarawak Tun Pehin Sri Dr Wan Junaidi Tuanku Jaafar, Menteri Besai Dato' Seri Anwar Ibrahim enggau Premier Sarawak. - EDISI UKAS

Pemberita : Ahmad Daniel Faiz
Gambar: Ibanez Jeffery