KUCHING: Operasyen penuh AirBorneo dikearap ulih mutar tating rayat Sarawak ba luar nengeri bekaul isu penerebai ti suah ditapi maya musin pengerami ketegal rega tikit ti tinggi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, naka diatu pengawa ngempu enggau operasyen kompeni bilun nya agi ba timpuh idar seraya ngujungka sekeda pemar apin ulih diadu manah.
“Tang, aku besampi ke taun baru, kitai bisi abis nadai enam bulan sebedau ngintu Gawai enggau pengerami bukai ngambi nguji mutar penanggul penerebai ti ditapi.
“Tu deka nentuka mobiliti rayat kitai ti gawa ba luar Sarawak ngambi pulai seraya ngemuntang rayat ti gawa ba Sarawak pulai ke menua sida,” ku iya.
Iya madah munyi nya maya dirandau pemberita pengudah Pengerami Nerima Pengabang Gawai Dayak 2026 di Kompleks Unit Pekara Pengarap Bukai (UNIFOR), ditu kena Hari Satu.
Ku iya, inisiatif numbuh AirBorneo nya iniisatif ti engkeman berindik ari penerebai nya nentuka Perintah Sarawak terus nyaup rayat bisi altenatif penerebai ti murah agi.
Datuk Patinggi Abang Zohari mega ngarap mayuh agi subsidi ulih diagih dikena nyaup mutar isu penerebai kelebih agi maya musin pengerami ti ngemata peminta ngagai tikit bilun nambah.
Iya mega madah, perintah nengeri naka ulih ngiga chara mutar pemadu manah nentuka rayat ulih ngasai ke pejalai ti menyana agi dudi hari.
Nambah ke nya, Premier Sarawak mega meri terima kasih ngagai pemekuh media ti semampai ngesan pangku pengawa ngelaku budaya enggau pengelain Sarawak ngagai semua rayat Malaysia.
Iya madah baru, pengawa ngerembai penerang tauka konten nengah pelasar digital baka media rama mega nyaup ngelaku penyelai budaya Sarawak ngagai temuai antarabansa.
“Tu deka matak minat sida belajar ke daya idup rayat Sarawak pupu bansa enggau pengarap.
“Nengah pengerami baka tu, komuniti luar ulih ngelala semak agi budaya enggau chara idup rayat Sarawak.
“Nya kebuah, aku deka meri terima kasih ngagai raban pemberita laban sida mega begulai ngesan pangku pengawa ngelaku budaya kitai,” ku iya.
Bela datai, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, Sapit Menteri Besai Datuk Amar Fadillah Yusof, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala menteri enggau sapit menteri kabinet Sarawak, tuai opis sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Ibanez Jeffery
