KUCHING: Sapit Premier Sarawak, Datuk Amar Douglas Uggah Embas ngelempai pemintar Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nentuka sekali ke iya deka terus bediri minta pilih tauka enda ba Pengawa Bepilih Nengeri (PRN) Sarawak ke deka datai.

Ngenang peragam bekaul iya deka pinchin ba arena politik, iya madah ke pekara nya prerogratif tuai parti lalu ukai pekara ti meseti diputus bepelasarka jaku sebubu ngapa.

“Aku nadai timbal bekaul pekara nya, aku ngelempaika pemutus nya ngagai Premier Sarawak ti mega Presiden Parti Pesaka Bumiputera Bersatu (PBB).

“Iya pintar agi nentuka sekali ke siku-siku tuai patut pinchin tauka terus gawa ke rayat,” ku iya.

Iya madah munyi nya maya dirandau pemberita ba Pengerami Nerima Pengabang Gawai Dayak 2026 ti dipenyadi Premier Sarawak di Kompleks Unit Pekara Pengarap Bukai (UNIFOR), kena Hari Satu.

Iya mega madah, tuai ti betukar nya pekara ti suah nyadi ba politik laban tetiap tuai bisi timpuh enggau pangku pengawa diri ngemudi pemansang nengeri.

Ku iya, faktor umur mega meseti dikira laban nya ulih nentuka penau siku-siku tuai neleba kediri enggau pemansang kemaya hari sereta teknologi baru.

Taja pia, iya madah ke tikas pengerai agi baka selama enggau manah lalu ngelempai pemutus ngagai tuai parti ngaga pemutus bekaul ngambi iya nyadi chalun ba PRN ke deka datai. - EDISI UKAS

Pemberita : Ahmad Daniel Faiz
Gambar: Ibanez Jeffery