SEOUL: Perintah Sarawak deka mayuh agi peranak menua enggau kompeni lokal diberi peluang masuk industri teknologi tinggi ti majak mansang ba nengeri tu nipak agenda pemansang ekonomi bepelasarka inovasyen enggau berega.
Berebak enggau nya, Sapit Premier Sarawak, Datuk Amar Awang Tengah Ali Hasan minta OCI Holdings Ltd. terus ngemerat pengereja pengawa ba operasyen enggau nambah pengawa meranak puku ba Sarawak.
Iya madah munyi lebuh ngetuai deligit Sarawak ba penemuai gawa ke indu opis OCI Holdings di Seoul kena Hari Lima, nyadi sebagi ari inisiatif mekuh kaul meranak puku enggau kerejasama ekonomi entara Sarawak enggau Republik Korea.
Naka diatu, operasyen OCI TerraSus di Taman Perindustrian Samalaju ngaji urung 1,100 pengereja enggau urung 90 peratus ari nya rayat Sarawak.
OCI mega bejalaika mayuh program pemansang penau nyengkaum latih profesional sereta peneleba antarabansa di Korea Selatan enggau Jipun dikena ngansah pengelandik pengereja pengawa menua.
Ba penerang sebaka, pengandal OCI ngagai ekosistem industri Sarawak mega dibantai nengah pengawa ngerembai pengawa meranak puku nengah kerejasama strategik ba Kumho P&B Chemicals Inc. nengah OCIKumho enggau Tokuyama Corporation nengah OTSM.
Kerejasama nya dikeandal ulih ngentapka penuduk Sarawak nyadi hab kilang teknologi tinggi enggau ekonomi meruan di rantau tu.
Datuk Amar Awang Tengah mega andal ke pengeran timpuh panjai OCI di Sarawak sereta nyemetak madah ke perintah nengeri deka terus ngetan polisi ngelantang pemeranak puku enggau inisiatif ngemuntang chara meranak puku strategik ke pemaik ekonomi nengeri enggau rayat. - EDISI UKAS
