KUCHING: Pengaya tradisyen enggau pesaka budaya komuniti Dayak meseti terus dijaga ngambi rebak biak enda lenyau pemereti ati lebuh Sarawak nuju pemansang ti deras mansang.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pengerami Gawai Dayak ukai semina mandangka pengawa beterima kasih asil ketau, tang mega nyadi pelasar beguna mekuh identiti budaya enggau ngetan tradisyen pesaka asal komuniti Dayak.

Ku iya, pesaka budaya ti ditampung kenyau ari aki ini kitai kelia nya pesaka berega ti meseti ditan nentuka rebak dudi majak ngelala sereta ngenang urat budaya sida.

“Pengerami tu ngingatka pengering kebendar Sarawak bepanggai ba bemacham etnik enggau chura budaya ti idup lantang ba siti payung menua Malaysia ti dibasa.

“Kebendar, pengaya tradisyen komuniti Dayak nya pesaka berega ti enda tau enda ditan enggau keran nentuka rebak biak kitai enda lenyau puncha tauka enda ingat ke urat budaya sida,” ku iya nengah pesan Gawai Dayak 2026 kena Hari Minggu.

Ku iya, Gawai Dayak mega nyadi jematan ti nyambung komuniti pupu bansa nengah adat ngabang enggau tradisyen pengerami nerima pengabang ti nyadi entara penyelai komuniti Dayak di Sarawak.

Ku iya, semangat segulai sejalai ti nyadi pun pengidup rayat Sarawak meseti terus ditan nentuka pengelantang ti diasai ngelama tu ulih dijaga. - EDISI UKAS