KUCHING: Pengawa nguasa bidang Sains, Teknologi, Injiniring enggau Matematik (STEM) sereta Pelajar enggau Latih Teknikal enggau Vokasional (TVET) meseti terus ditegap nentuka peranak asal Sarawak ulih besemekih ba ekonomi dudi hari ti majak disungkak teknologi enggau inovasyen.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, pemansang modal mensia ti bepengelandik tinggi nya entara kebuah ngemujur juluk Sarawak nyadi nengeri maju bepenatai pemisi tinggi manggai taun 2030.
Ku iya, pengawa nguasa STEM enggau TVET beguna amat dikena nyeliah takah ekonomi ti besai agi sereta nentuka peranak asal enda tinggal ngerebut peluang gawa begaji besai.
“Ba transfomasyen pelajar nya beguna amat nentuka peranak asal Sarawak ngemerat pengawa nguasa subjek Sains, Teknologi, Injiniring enggau Matematik (STEM) sereta Pelajar enggau Latih Teknikal enggau Vokasional (TVET) dikena nyeliah takah ekonomi ti besai agi.
“Pengawa semina milih subjek mudah ba renggat kolej enggau universiti lalu enda berati ke makit ti tegap deka ngasuh pengereja menua lenyau peluang gawa begaji besai seraya peluang emas ba sektor industri besai deka dipenggi raban bukai ti besemekih agi,” ku iya nengah pesan Pengerami Gawai Dayak 2026 kena Hari Minggu.
Berebak enggau nya, Tun Pehin Sri Dr Wan Junaidi mega ngelalau bala tuai enggau apai indai mangku pengawa besai meransang sereta ngembing rebak biak milih pelajar ti engkeman enggau peminta kemaya hari.
Ku iya, taja pen bidang STEM enggau TVET suah disebut mayuh pemar tang pengawa nguasa bidang nya ulih nyendia peluang kereja sereta nambah semekih pengereja menua. - EDISI UKAS
