KUCHING: Perintah Gabungan Parti Sarawak (GPS) keran negap pemansang infrastruktur, pelajar enggau pengelantang rayat nentuka pemansang ti diasai ke semua komuniti ba nengeri tu.

Sapit Premier Sarawak, Datuk Amar Douglas Uggah Embas madah, pengeran nya dibantai nengah bemacham inisiatif enggau polisi ti dipejalai perintah nengeri dikena nambah tikas idup rayat kelebih agi ba menua pesisir.

Ku iya, perintah diatu benung chakah bejalaika projek nyeruri 5,979 kilometer jalai batang lama di selampur Sarawak dikena nambah rentayan enggau aksesibiliti komuniti menua pesisir.

“Jalai ti manah agi ukai semina nambah penyambung entara endur, tang mega nyendia peluang ekonomi, ngerembai akses ngagai fasiliti pengerai enggau pelajar sereta ngubah kualiti idup rayat,” ku iya nengah pesan Pengerami Gawai Dayak 2026.

Ba sukut pelajar, iya madah ke pengawa bejalaika Skim Pelajar Tinggi Pechuma Sarawak (FTES) nya siti inisiatif besejarah ti mandangka pengeran perintah nengeri ba pemansang modal mensia.

Ku iya, nengah skim nya, anak Sarawak ulih nampung pelajar ba bidang Sains, Teknologi, Injiniring enggau Matematik (STEM), nyengkaum undang-undang enggau psikologi di universiti enggai Sarawak lalu enda nating ruang bilik sida.

“Pelajar nya kunchi mutus ke perekuh penyeranta sereta nempa pemansang ti menyana agi ungkup rebak biak,” ku iya.

Berebak enggau nya, Datuk Amar Douglas Uggah madah, inisiatif Bantu Barang Diguna Pemun Sarawak (SKAS) mandangka penyiru perintah nengeri nyaup ngelempung tating belanja rayat berindik ari rega barang niki ketegal penyarut di Asia Barat.

Ku iya, penyampau bantu SKAS ungkup taun 2026 udah ditambah ngagai RM1,100 setaun ungkup ruang bilik dibanding RM950 sebedau tu, RM600 setaun ungkup orang tuai dibanding RM500 sereta orang bujang nerima RM375 setaun dibanding RM300.

Ku iya, bayar SKAS dipejalai nengah tiga renggat ke alai renggat kedua udah belabuh diagih kena 15 Mei tu tadi.

Ngenang Pengerami Gawai Dayak, Datuk Amar Douglas Uggah madah ke pengerami nya awak ti besai reti ngagai komuniti Dayak beterima kasih ke jereki enggau pemaik ti udah diasai seraya nyempil kaul enggau diri sebilik sereta nyaga pesaka budaya enggau adat asal ti ditampung ari aki ini kitai kelia.

Iya mega nyemetak madah ke semangat beserakup ti nyadi pugu pengering Sarawak meseti terus ditegap nipak konsep Segulai Sejalai ti nyadi identiti rayat nengeri tu.

“Aram mih kitai terus seati enggau begulai ngemujur Strategi Pemansang Pengudah COVID-19 (PCDS) 2030 nuju Sarawak ti lantang, inklusif enggau meruan,” ku iya.

Ngena peluang nya, iya meri Selamat Ngintu Gawai Dayak nuju semua komuniti Dayak di Sarawak sereta ngarap pengerami taun tu mai pengaga, pengelikun, pengerai ti manah sereta pengelantang ngagai semua. - EDISI UKAS