KUALA LUMPUR: Kebawah Duli Paduka Baginda Tengku Ampuan Pahang Tunku Azizah Aminah Maimunah Iskandariah Almarhum Sultan Iskandar Al-Haj limpang ngelawa pemandang sereta aktiviti ti diatur di Reruai Pustaka Negeri Sarawak serimbai Pengerami Bup Antarabansa Kuala Lumpur (PBAKL) 2026, kena Hari Minggu.

Penemuai nya siti basa ti besai reti dikena ngelati pesaka budaya sereta mandangka pesaka penemu enggau litaricha sarawak ngagai mensia mayuh.

Ba penemuai nya, Tengku Ampuan Pahang mega ngemata pengawa nebah Sape enggau Tanda Orang Ulu ti dipandang Anderson Kalang begulai enggau tim MupunTauh Orang Ulu Ladies.

Anderson Kalang, ti mega dikelala “Sape’ Shredder” sereta ke mega pemungkal begulai Kuala Lumpur Sape’ Collective enggau tim MupunTauh asal ari etnik Kelabit enggau penebah Sape, petanda budaya enggau pemekuh seni ti ransing ngelaku pesaka budaya Borneo ba tikas nasional enggau antarabansa.

Pemerindang nya mega mandangka pengelain seni muzik asal Sape ti dipegulai enggau tanda asal komuniti Orang Ulu, seraya mandangka pengaya pesaka budaya Sarawak ngagai bala pengusung PBAKL 2026.

PBAKL 2026 ti diatur belabuh ari 29 Mei nyentuk 7 Jun 2026 di Palan Dagang Dunya Kuala Lumpur (WTCKL), lalu Reruai Pustaka Negeri Sarawak terus nyadi pelasar ngelaku pengawa nyelak, budaya enggau pesaka asal nengeri ngagai bala pengusung ari selampur menua. - EDISI UKAS