SRI AMAN: Lebih 3,000 pengusung ngerichah Program Nerima Pengabang Gawai Dayak 2026 diatur Kaban Kunsil Nengeri (ADUN) Simanggang, Datuk Francis Harden Hollis enggau sida sebilik ba rumah iya di Jalai Tini, Munggu Sabun kena Hari Satu.

Pengerami nya richah enggau penatai Sapit Premier Sarawak, Datuk Amar Profesor Dr Sim Kui Hian enggau Menteri Pengangkut Sarawak, Dato Sri Lee Kim Shin sereta bala tuai komuniti menua.

Kelimpah betemu enggau temuai dipebasa sereta peranak ti datai, Datuk Francis ti mega Sapit Menteri Pelajar, Inovasyen enggau Pemansang Penau Sarawak udah nyua chek Projek Mit Pemansang Menua Pesisir (MRP) ngagai 20 kelab enggau gerempung ba DUN Simanggang.

Belanja sepenyampau RM143,000 nya diagih dikena nyaup melanja bemacham aktiviti enggau program ti dilanggur kelab sereta gerempung nya sepanjai taun tu.

Nangkan nya, Datuk Amar Dr Sim muji inisiatif Datuk Francis enggau sida sebilik ti terus sedia ngambat penatai komuniti pupu bansa enggau tirai juru ngambi begulai ngerami Gawai Dayak.

“Pesan ti dipandang nengah timbal mensia mayuh ngagai program ti dipeda manah amat lalu engkeman negut kaul penyerakup rayat pupu bansa dikena nempa menua bansa bepuguka pengelebih Sarawak.

“Nya kebuah, aku ngarap ke pengelantang baka tu terus ditan nentuka semua rayat terus meri perati begulai ngemujur Strategi Pemansang Pengudah COVID-19 (PCDS) 2030,” ku iya. - EDISI UKAS