Ahli Dewan Negara, Senator Michael Mujah Lihan madah, program Ngabang Gawai Dayak ti diatur ninting taun nyadi pelasar nyempil kaul entara peranak ba Sungai Asap, Tubau enggau Sebauh.
Ku iya, budaya ngabang maya musin pengerami nya pengawa ti suah diatur rayat Sarawak lalu mandangka pengelantang ti ditanggam nadai ngira raban bansa, pengarap tauka tirai juru.
“Genap kali Pengerami Gawai Dayak, peranak ari Sungai Asap deka ngabang ke Tubau, lalu maya Hari Krismas, peranak ari Tubau deka ngabang ke Sungai Asap.
“Tradisyen tu mandangka penyelai komuniti Sarawak ti semampai idup lantang, bela bebasa enggau ngerami bemacham budaya begulai,” terang iya.
Iya madah munyi nya lebuh ngulu ke raban PBB Pampang Murum ngatur pejalai ngabang Gawai Dayak 2026 ngagai sekeda rumah panjai enggau rumah tuai komuniti di Tubau enggau Sebauh, kena Hari Satu.
Entara endur ti digusung iya nya Rumah Tr Rata, Rumah Tr Slan, Rumah Tr Mabong enggau Rumah Tr Albert di Tubau sebedau nampung pejalai ngabang ngagai ex-Sekretari Politik Premier Sarawak, Jenny di Selabit.
Udah nya, sida nembuka pengawa ngabang ngagai rumah Menteri Industri Pemakai, Komoditi enggau Pemansang Kandang Menua Sarawak, Dato Sri Dr Rundi Utom di Sebauh.
Sekumbang ngabang, Senator Michael Mujah mega ngena awak nya berandau enggau mensia mayuh seraya mendingka peminta sida.
Iya nerang, program baka nya ukai semina dikena ngintu pengerami, tang mega nyadi pelasar beguna nyempil kaul sebakih, narak semangat begulai sereta ngerapit rentayan kerejasama entara komuniti. - EDISI UKAS
