SIBU: Semangat penyerakup enggau pengelantang ti dikemeran rayat pupu bansa di Sarawak terus nyadi tiang penegap politik, pemansang ekonomi sereta pemansang nengeri ti meruan.
Sapit Premier Sarawak, Datuk Amar Profesor Dr Sim Kui Hian madah, budaya pengidup peranak rumah panjai ti ngemerat pengawa begulai enggau bela bebasa ke pangan diri mandangka peneguh penyerakup rayat di nengeri tu ti meseti terus dijaga nentuka Sarawak meruan maju enggau lantang manggai 2030.
“Budaya rumah panjai baka tu mandangka penyerakup. Maya kitai seati enggau bisi penyerakup, baru penegap nyadi. Maya bisi penegap, baru bisi pemansang enggau pengelantang.
“Nya kebuah, beguna endar kitai ngetan penyerakup enggau penegap tu nentuka kitai majak maju enggau lantang manggai 2030,” ku iya.
Iya madah munyi nya ba Program Penemuai Begulai enggau Duta Besai Republik Rayat China ke Malaysia, Ouyang Yujing ngagai Rumah Joseph Abet di Bawang Assan, kena Hari Tiga.
Datuk Amar Dr Sim mega madah, penegap ti diasai ke Sarawak diatu nentuka perintah nengeri bejalaika mayuh projek pemansang sereta inisiatif ti meri pemaik terus ngagai rayat.
Ku iya, taun tu aja, Perintah Sarawak bejalaika projek pemansang beungkus RM9 bilion kelimpah nampung mayuh bantu ngagai rayat nyengkaum ba bidang pelajar enggau pengelantang.
Nambah ke nya, iya ti mega Menteri Pengerai Mensia Mayuh, Pengawa Berumah enggau Perintah Lokal Sarawak madah, penemuai Ouyang ke rumah panjai serimbai Pengerami Gawai Dayak mandangka Sarawak majak diaku tikas antarabansa.
Ku iya, duta nya sebedau tu kala ngatur penemuai ke Kuching enggau Miri, tang milih nemuai ke Bintulu dan Sibu maya Pengerami Gawai taun tu ngambi berati kediri budaya sereta pengidup komuniti Sarawak.
Iya mega madah ke Pengerami Gawai nya ukai semina pengerami ninting taun laban nya ngerapit kaul diri sebilik, semangat bekunsi sereta penyerakup entara komuniti pupu bansa ba nengeri tu.
Bela datai, Konsul Jeneral Republik Rayat China di Kuching Xing Weiping, Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee, Kaban Kunsil Nengeri (ADUN) Bukit Assek Chieng Jin Ek, ADUN Meradong Datuk Ding Kuong Hiing enggau Sapit Chairman Kaunsil Pelilih Menua Pesisir Sibu (MDLBS) Kaunselor Wong Ching Yong. - EDISI UKAS
