LUNDU: Pengeransing Perintah Sarawak negap pemansang menua pesisir terus dipandang nengah pejalai mayuh projek perengkaguna pemun nyengkaum ngaga Balai Mayuhguna Kampung Sebiris beungkus RM570,000 ti dipenyadi serimbai Pengawa Nangguh Program Gawe Basaroh 2026, kena Hari Dua.

Kaban Kunsil Nengeri (ADUN) Opar, Billy Sujang madah, projek nya mandang inisiatif meruan perintah nyendia perengkaguna ti lantang enggau bekualiti agi ke pengelantang komuniti menua pesisir.

Ku iya, pengawa ngaga Balai Mayuhguna Kampung Sebiris ngaul agih belanja sepenyampau RM350,000 ungkup Renggat Satu enggau RM220,000 ungkup Renggat Dua ti beungkus RM570,000.

Ku iya, balai nya deka nyadi palan ngatur bemacham aktiviti komuniti nyengkaum program komuniti, main asal enggau pemansang rama peranak menua.

Kelimpah balai mayuhguna, Kampung Sebiris mega nerima mayuh projek pemansang bukai baka nyeruri jalai kebun, melakin jalai nuju genturung pendiau, nyeruri sistem paip ai bukit sereta projek nyeruri gelanggang futsal ti benung dipejalai.

Ba pengawa nya, iya mega bejadi Sistem Paip Ai Bukit Kampung Sebiris ti disadang meri pemaik ngagai peranak nengah nyendia perengkaguna pemun ti menyana agi.

Nangkan nya, Chairman Pengatur Pengawa, Merisen Lanjong madah ke Program Gawe Basaroh taun tu ngaul 28 stesyen ari Kampung Sebiris nyentuk Kampung Tebaro lalu mujur ngempuru komuniti enggau chukup richah serimbai Pengerami Gawai Dayak.

Sama datai, Sekretari Politik Premier Sarawak, Niponi Undek. -EDISI UKAS