PADAWAN: Kampung Annah Rais terus ngentapka penuduk nyadi entara palan dagang temuai budaya di Sarawak nengah pengawa ngatur Program ‘Kampung Takeover Coca-Cola’ serimbai Pengerami Gawai Dayak 2026 ti richah diatur digulu komuniti menua enggau penatai pengusung ari mayuh endur.

Program nya udah digulu Sapit Menteri Pengangkut Sarawak ti mega Kaban Kunsil Nengeri (ADUN) Mambong, Datuk Dr Jerip Susil begulai enggau Direktor Pekara Mensia Mayuh, Komunikasyen enggau Pemeruan (PACS) Coca-Cola Ungkup Malaysia, Singapura enggau Brunei, Khairul Anwar.

Atur program nya ukai semina ngerichah Pengerami Gawai, tang mega nyadi pelasar beguna mandangka penyelai adat enggau budaya komuniti Bidayuh Biannah ngagai mensia mayuh.

Datuk Dr Jerip madah, program baka nya ulih negap komuniti menua pesisir seraya nyaup ngelaku Kampung Annah Rais nyadi palan dagang temuai budaya ti ulih matak mayuh agi pengusung.

Ku iya, pesaka budaya komuniti Bidayuh meseti terus dijaga enggau dikelaku laban nya aset beguna ti ukai semina nyagu identiti komuniti, tang mega ulih nyungkak pemansang ekonomi menua nengah sektor dagang temuai.

“Semangat Gawai ti dirami diatu ukai semina pengerami, tang mega lambang penyerakup, pesaka asal enggau identiti komuniti ti meseti terus dijaga sereta dipandang ngagai rebak dudi,” ku iya.

Iya mega madah ke kerejasama entara komuniti, sektor peribit enggau tuai menua nyadi chara positif dikena ngerembai promosyen dagang temuai budaya lalu nyendia mayuh agi peluang pemansang ngagai komuniti menua pesisir.

Bela datai, Pegawai Opis Pelilih Mit Padawan Julius Scott Sapong. - EDISI UKAS