PADAWAN: Program Berarak Bipajak Gawai Segu Bunuk Edisyen Ke-4 richah dikemujur urung 1,200 penyereta ngaul 21 kontinjen ti mandangka penyelai budaya sereta pesaka asal komuniti Bidayuh ari Bisegu enggau Padawan.

Program nya richah enggau penatai Sapit Menteri Pengangkut Sarawak ti mega Kaban Kunsil Nengeri (ADUN) Mambong, Datuk Dr Jerip Susil enggau Kaban Parlimen Puncak Borneo, Datuk Willie Mongin ti begulai meda pengawa bejalai beraban ti richah nya enggau kelai komuniti Bidayuh temegah.

Sepanjai bejalai beraban, tetiap kontinjen bekenaka pekayan asal ti nyelai sereta pemerindang main asal ti mandangka identiti, adat asal enggau semangat ngintu Gawai ti agi teguh ba komuniti menua.

Penatai pengusung ari mayuh endur mega nambah pengerichah program lebuh mensia mayuh nedatka tisi jalai endur bejalai beraban ngambi meda pengelain budaya ti dipandang.

Datuk Dr Jerip madah, program baka nya ukai semina nyadi pelasar nyempil kaul enggau penyerakup komuniti, tang mega ngesan pangku pengawa besai dikena nyaga sereta nyagu pesaka budaya Bidayuh ngambi majak relevan enggau ditampung rebak biak.

Ku iya, kerejasama komuniti ba program nya nunjukka mensia mayuh agi ngenang enggau ngetan adat sereta tradisyen ti nyadi identiti sida kenyau ari aki ini sida kelia.

Bela datai, Pegawai Pelilih Siburan Ranum Bari enggau Pegawai Opis Pelilih Mit Padawan Julius Scott Sapong. -EDISI UKAS