SELANGAU: Pengerami Gawai Dayak 2026 di Rumah Panjai Kepayang Jaya, Sungai Arip, ditu richah enggau mayuh adat enggau budaya ti mandangka penyelai pesaka asal komuniti Dayak.

Pengerami dipun pagi 31 Mei nengah pengawa Beranchau Tikai kelai ngepun Gawai Dayak 2026 di rumah panjai nya.

Muak ke lemai, pengawa Miring di Tiang Pengingat diatur kelai basa ngagai adat enggau pengarap komuniti menua, ditangkan Pengawa Mupu Ke Antu Rua ti nyadi sebagi ari tradisyen Gawai.

Maya malam, rumah panjai nya majak richah nengah pengawa Bejalai Niti Ruai lebuh peranak bekenaka Ngepan Iban, Baju Burung enggau Kain Burie, kelimpah pekayan moden baka baju kebaya enggau batik.

Pengawa Makai di Ruai mega narit ati lebuh bemacham pemakai asal enggau moden disedia ngambi bela diempa begulai baka pansuh enggau pulut ti nyadi pemakai dikerindu bala mayuh.

Rumah panjai 27 pintu nya mega ngatur bemacham aktiviti enggau pekit dikena nyempil kaul sereta semangat begulai entara peranak.

Pengerami taun tu mega richah nengah pengawa Ngirup Ai Pengayu sereta sekeda pekit ti nerima timbal manah ari peranak rumah panjai nya. - EDISI UKAS