SEOUL: Sarawak terus ngentapka penuduk nyadi palan meranak puku teknologi tinggi lebuh nyerungkai kerejasama strategik enggau pemekuh besai industri semikonduktor Korea Selatan dikena ngerumban pemansang ekosistem semikonduktor nengeri.

Sapit Premier Sarawak Datuk Amar Awang Tengah Ali Hasan nampung penemuai rasmi ke Pangyo Tech Park, Korea Selatan ngambi berandau lenak agi enggau Korea Semiconductor Industry Association (KSIA) bekaul kerejasama enggau Sarawak sereta akses ngagai makit ASEAN nengah kerejasama strategik.

Udah nya, iya betemu enggau InterVest Co., Ltd., siti ari kompeni puku tebilang di Korea Selatan, dikena nyerungkai peluang meranak puku ba ekosistem semikonduktor Sarawak.

Randau nya mega ngaul kompeni portfolio InterVest iya nya Mobilint enggau Soteria.

Tuju kededua randau nya dikena ngerandang peluang meranak puku ba sektor kilang maju Sarawak lalu meri perati khas ngagai industri semikonduktor enggau servis digital.

Muak ke lemai, Menteri Dagang Antarabansa, Industri enggau Pengawa Meranak Puku Sarawak mega ngatur randau enggau siti da raban pemeranak puku ngambi berandauka pengulih numbuh dagang rentayan bekal entukar elekterik (EV) di Sarawak.

Randau nya nipak Strategi Pemansang Pengudah COVID-19 (PCDS) 2030 ti mandangka juluk Sarawak nyapai status ekonomi bepenatai pemisi tinggi enggau maju manggai taun 2030, disungkak inisiatif ekonomi baru bepelasarka data enggau inovasyen. - EDISI UKAS