SIBU: Parti Sa’ati Rayat Sarawak (SUPP) Pampang Bawang Assan ngabang Gawai ngagai sekeda rumah panjai ba Bawang Assan ngambi ngerami pengerami nya begulai enggau komuniti Dayak, kena Hari Satu.
Chairman SUPP Pampang Bawang Assan, Kaunselor Kevin Lau Kor Jie madah, Pengerami Gawai Dayak nya pengerami ti mandangka pengaya pesaka budaya Sarawak sereta nyadi pelasar pemadu manah nyempil kaul entara komuniti pupu bansa di nengeri tu.
Ku iya, pengerami nya ukai semina meri peluang nyempil kaul, tang mega nyadi pelasar tuai ngundang rayat sereta mereti ke peminta sida.
“Pengerami Gawai Dayak ukai semina pengerami ngetau asil tauka awak begempuru enggau diri sebilik, tang mega pelasar beguna mandangka penyelai Sarawak ba konteks pengelantang, bela bebasa enggau besilih budaya entara raban bansa.
“Aktiviti baka tu meri peluang ngagai tuai komuniti ngambi mending kediri sebana enggau peminta peranak rumah panjai,” ku iya.
Iya ngarap ke program baka nya ulih ditampung dikena nyempil kaul entara tuai enggau rayat kelimpah nentuka sada komuniti ba renggat baruh semampai diperati.
Entara endur ti digusung iya nya Rumah Thomas Palus, Rumah Luke Sulai, Rumah Peter Tinggom, Rumah Stewart Dinggi, Rumah Abell dan Rumah Milli sereta rumah Temenggong Stanley Gramong Bandar.
Ba pejalai ngabang nya, Kaunselor Kevin Lau begulai enggau raban dikangau ngulu pengawa Miring di Rumah Stewart Dinggi ti mega entara adat beguna komuniti Dayak dikena ngintu Gawai Dayak.
Program nya mega digulu kaban SUPP Bawang Assan sereta tuai komuniti menua ti begulai ngundang peranak rumah panjai sepanjai penemuai nya. - EDISI UKAS
