Berebak enggau nya, Sapit Premier Sarawak, Datuk Amar Douglas Uggah Embas begulai enggau raban iya ngabang Gawai ngagai sekeda rumah panjai ba Ulu Paku kena Hari Dua ngambi ngundang peranak sereta bekunsi pengerichah pengerami begulai enggau komuniti menua.
Kaban Kunsil Nengeri (ADUN) Bukit Saban nya ngelawa Nanga Paun, Jukun, Lubok Kelampu enggau Danau nyadi sebagi ari program ninting taun iya ngambi terus ngundang rayat kelimpah mendingka kediri pemansang komuniti dia.
Sekumbang ngabang, Datuk Amar Douglas Uggah peluang berandau enggau peranak rumah panjai sereta besilih penemu bekaul bemacham isu pemansang menua.
Penatai iya begulai enggau raban mega diambat peranak ti beterima kasih ke penyanggup tuai nya begulai ngerami Gawai Dayak.
Program nya mega mandangka semangat beserakup enggau pengelantang ti nyadi pun ngintu Gawai Dayak di Sarawak.
Bela nyempulang Datuk Amar Douglas iya nya bini, Datin Doreen Mayang, Tuai Raban Indu PBB Pampang DUN Bukit Saban Natasha Nasa Uggah enggau Sapit Tuai Pampang Bukit Saban Abang Madehi Abang Abdul Latip. - EDISI UKAS
