Jematan Batang Lupar Enggi Begulai, Nyaga Pemeresi Tanggungpengawa Semua
KUCHING: Pemanah Jematan Batang Lupar 1 ti dikemegah rayat Sarawak tentu ngasuh sapa-sapa aja ti betengahka jalai nya berasai temegah.
Kenyau ari ulih ditengah bala penguna, jematan ikonik nya ukai semina ngemuntang pejalai peranak tang mega nyadi palan penyangkai mensia mayuh ti deka nimpai pemanah Sungai Batang Lupar sambil begambar ungkup kenang enggau diri sebilik sereta bala bakih.
Tang, ari pengagit ngasai ke fasiliti baru nya, mensia mayuh ditangkan semampai nyaga pemeresi enggau pengelantang ba jematan nya.
Uras ti dibuai sengapa alai ukai semina ngamahka endur nya tang mega ulih ngamahka perengkaguna ti digaga ke pemaik rayat.
Nya alai, bala penguna dipinta semampai nyaga ulah lalu muai uras ba endur ti patut sereta nyaga fasiliti ti disedia.
Jematan Batang Lupar 1 sepanjai 4.844 kilometer ti ulih ditengah mensia mayuh kena 21 Mei tu tadi nyadi jematan meraka sungai pemadu panjai di Malaysia.
Digaga beungkus RM848.7 juta ngena belanja Perintah Sarawak, jematan nya nyadi sebagi ari inisiatif nambah rentayan penyambung ba kandang tebing tasik nengeri tu.
