KAPIT: Projek jalai semin beungkus RM200,000 di Rumah Weng, Nanga Sempurau, Mujong deka meri pemaik ngagai peranak menua enggau nambah fasiliti penyambung sereta akses ngagai endur ngelingi nya.

Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong madah, projek nya mandangka pengeran Perintah Sarawak nyendia perengkaguna pemun ti menyana agi ngagai komuniti menua pesisir enggau menua ulu.

Iya madah, perintah deka terus bejalaika mayuh projek pemansang dikena ngubah tikas idup rayat sereta nentuka infrastruktur ulih diasai ke serap komuniti.

“Pemansang ti dipejalai perintah nentuka rayat ngasai perengkaguna ti menyana agi enggau nambah pengelantang idup sida.

“Nya kebuah, rayat meseti terus meri sukung lalu bekerejasama enggau Perintah Gabungan Parti Sarawak (GPS) ngambi agenda pemansang ulih dipejalai,” ku iya ba pengawa bejadi projek nya, kena Hari Tiga.

Kelimpah bejadi projek jalai semin nya, iya mega nyuaka geran sepenyampau RM30,000 ngagai komuniti menua dikena nyukung pejalai aktiviti komuniti enggau pemansang komuniti.

Ari penyampau nya, RM20,000 diagih ngagai Komiti Pemansang enggau Pengelikun Genturung Pendiau (JKKK) sereta RM10,000 da diagih ngagai Gerempung Indu.

Bela datai, Pegawai Pelilih Kanowit Cerisologo Sabut. - EDISI UKAS