MIRI: Semangat Parti Sa’ati Rayat Sarawak (SUPP) negika hak ti bepuguka inklusiviti, pengelurus enggau penyerakup terus relevan napi pemar sereta nempa pemansang Sarawak ti maju enggau lantang agi.

Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin madah, kenyau ari ditumbuh kena 4 June 1959, SUPP konsisten negika hak rayat Sarawak nadai ngira raban bansa, pengarap enggau budaya.

Ku iya, SUPP bisi penuduk ti nyelai ba sejarah politik nengeri nyadi parti politik keterubah ti ditumbuh lebuh jeman dipegai British lalu terus mangku pengawa besai ba pemansang Sarawak nyentuk diatu.

“Taja napi mayuh pemar sepanjai 67 taun ditumbuh, SUPP terus relevan asil penyerakup, pengeliat enggau pengeransing kaban SUPP maya gawa ke rayat.

“Pupu bansa dalam parti tu nyadi pengering nempa pemujur enggau penegap ngemansang SUPP kenyau ari suba nyentuk diatu,” ku iya.

Iya madah munyi nya ba Pengawa Ngitau Tambai serimbai Genap Taun Ke-67 SUPP ti diatur ba Balai Unity, ditu kena Hari Empat.

Program diatur Komiti Penyambung Parlimen SUPP Miri-Sibuti begulai enggau lima pampang iya nya Senadin, Pujut, Piasau, Lambir enggau Bekenu nya ngempuru tuai sereta kaban parti dikena ngingatka sejarah enggau negika SUPP kenyau ari ditumbuh.

Ku Dato Sri Lee, taja napi mayuh penguji ba jeman kolonial, bala tuai ti dulu tetap negika juluk rayat dikena nyapai pengawa ngemudi kediri, pengelurus enggau pemansang ti manah agi ungkup nengeri tu.

Berebak enggau nya, iya ngelalau rebak biak mereti ke sejarah penumbuh Malaysia sereta dokumen beguna baka Sempekat Malaysia 1963 (MA63), Ripot Komiti Entara Perintah (IGC) enggau Ripot Cobbold.

Ku iya, pengawa mereti ke sejarah nya beguna amat nentuka hak, autonomi enggau penuduk konstitusyen Sarawak terus dijaga sereta ditan ungkup rebak dudi.

Bela datai, Datuk Bandar Bandaraya Miri ti mega ADUN Pujut, Adam Yii Siew Sang sereta pengari enggau kaban parti ari lima pampang SUPP di Miri enggau Sibuti. - EDISI UKAS