SRI AMAN: Pengerami Gawai Dayak diatu dipeda majak bebida dibanding suba, tang reti adat enggau budaya komuniti Dayak meseti terus ditan ngambi enda lenyau disegang arus pemansang jeman.

Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah ke komuniti Dayak ti ngerami Gawai diatu lalu tebal agi semina ulih ngetan sukut adat enggau budaya, berindik ari ubah pengidup sereta pengarap.

Ku iya, komuniti Iban ti diau ba rumah panjai suba ngerami Gawai nitih guna lalu mayuh meri perati ngagai pengarap.

“Tang diatu, tebal agi komuniti Iban udah megai pengarap Kristian enggau Pengerami Gawai diintu dikena nyaga adat budaya baka ngena baju burung, ngepan sereta mandangka Ajat Ngalu Pengabang.

“Taja bebida dibanding suba, adat enggau budaya tu meseti terus ditan laban nya identiti komuniti Dayak,” ku iya.

Iya madah munyi nya ba Program Ngabang Dayak 2026 di Rumah Suntie, Sebujok, Ulu Undop, ditu kena Hari Tiga.

Nambah ke nya, Datuk Francis ti mega Kaban Kunsil Nengeri (ADUN) Simanggang meransang komuniti Iban terus ngemeran adat enggau budaya raban bansa sida maya ngambat penatai pengabang ba rumah panjai serimbai ngintu Gawai.

Ku iya, inisiatif nya beguna amat dikena mandangka penyelai budaya komuniti Dayak ngagai temuai kelebih agi sida ti ukai ari raban bansa nya.

“Atur tu beguna amat nentuka temuai ulih berati kediri adat sereta budaya kitai lalu bekunsi peneleba nya ngagai komuniti bukai,” ku iya.

Ba pengerami sama, iya mega nyua chek agih belanja Projek Mit Pemansang Menua Pesisir (MRP) ngagai empat Komiti Pemansang enggau Pengelikun Genturung Pendiau (JKKK) sereta siti gerempung indu ngaul agih belanja sepenyampau RM28,000 dikena ngemujur mayuh aktiviti.

Iya mega bejadi jematan gantung baru Kampung Sebujok Ulu Undop beungkus RM550,000 ti digaga nengah Program Transfomasyen Menua Pesisir (RTP) DUN Simanggang. - EDISI UKAS