KUALA LUMPUR: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi nerima penemuai basa ari Profesor Dato Sri Dr Mike K.S. Chan begulai enggau Datuk Colin Chai sereta deligit ba rumah seduai, kena Hari Empat.

Profesor Dato Sri Dr Mike nya mega siku saintis, pemansik enggau pengarang ti tebilang ba renggat antarabansa sereta diaku nyadi pemungkal ba bidang pansik sel stem, imunologi enggau perubat bioregeneratif.

Randau nya nyadi pelasar bedua penemu bekaul pemansang pelajar tinggi, pengelebih inovasyen, pansik sereta bekunsi penemu dikena negap pemansnag modal mensia enggau pengelantang komuniti.

Pia mega, kededua raban mega nyerungkai pengulih kerejasama strategik ti ulih nyungkak pelajar, pansik enggau penau di Sarawak.

Ba randau nya, Tun Pehin Sri Dr Wan Junaidi mega ngemeratka pemesai guna inisiatif meransang budaya penemu, inovasyen enggau pansik nyadi penyungkak pemansang nengeri dudi hari.

Iya begulai enggau Toh Puan Datuk Patinggi Fauziah mega meri terima kasih laban udah nemuai sereta ngarap ke pemanah kaul ti ditanggam rat agi ungkup pemansang pelajar, pemansang penau enggau pengelantang rayat. - EDISI UKAS