SERIAN: Adat asal enggau budaya komuniti Bidayuh meseti terus dijaga sereta ditampung ngagai rebak biak nentuka identiti enggau pesaka asal komuniti nya enda lenyau disegang arus pemansang sereta ubah jeman.

Kaban Parlimen Serian, Dato Sri Richard Riot Jaem madah, pengawa ngetan adat enggau budaya asal meseti nyadi tanggungpengawa begulai, kelebih agi rebak biak ti deka nampung pesaka budaya komuniti dudi hari.

Iya madah munyi nya lebuh bejadi Pengerami Gawai Dayak Kampung Pichin 2026 ti richah diatur kena Hari Dua.

Ku iya, budaya enggau adat asal nya pesaka ti chukup berega sereta nyadi lambang identiti sesebengkah komuniti ti meseti terus ditan.

Pengerami taun tu besuluka jaku ‘Kinakal Adat Bidayuh Tinan Nyindi Adup’ ti mai reti Jaga Adat Bidayuh Nyadi Kereba Ngempung Peranak Kampung Pichin.

Sulu jaku nya ngemerat pemesai guna adat enggau budaya Bidayuh nyadi pugu penyerakup, pengelantang sereta identiti komuniti menua maya napi pemar pemansang enggau ubah kemaya hari.

Berebak enggau nya, iya madah ke raban nembiak ti ngambi bagi ba aktiviti main asal, seni enggau adat asal beguna endar nentuka pesaka komuniti Bidayuh terus relevan enggau ditampung rebak dudi. - EDISI UKAS