LUNDU: Semangat begulai majak rat lebuh lebih 1,000 pengusung ngerichah Pengerami Nerima Pengabang Gawai Kaban Kunsil Nengeri (ADUN) Opar, Billy Sujang ba rumah iya di Kampung Sebako 2, kena Hari Tiga.

Pengerami ti diatur kenyau ari tengah hari nya ngempuru rayat pupu bansa enggau pengarap seraya mandangka semangat begulai ti nyadi identiti rayat Sarawak.

Bela ngerichah pengerami, Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak Datuk Amar Profesor Dr Sim Kui Hian, ADUN Batu Kitang Dato Ir Lo Khere Chiang sereta Sekretari Politik Premier Sarawak Kho Teck Wan.

Pengerami nya richah enggau bemacham pemakai asal Gawai ti dinah ngagai bala temuai lalu meri peluang ngagai bala pengusung nyempil kaul enggau pangan diri.

Pengawa ngatur pengerami nerima pengabang nya nipak juluk Perintah Sarawak ti semampai ngemerat pemesai guna beserakup, begulai enggau pengelantang rayat pupu bansa nyadi pugu penegap enggau pemansang nengeri.

Kelimpah nyadi nalan ngintu pengerami, program baka nya mega ngerapit kaul entara tuai enggau rayat. - EDISI UKAS