Semua Rumah Panjai DUN Marudi Deka Disikap Bekal Kuasa Karan 24 Jam Taun Tu
MIRI: Seluruh rumah panjai ba Kunsil Nengeri (DUN) Marudi disadang disikap bekal kuasa karan 24 jam ujung taun tu.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak ti mega Kaban Kunsil Nengeri (ADUN) Marudi Datuk Dr Penguang Manggil madah, naka diatu semina 16 rumah panjai dia apin disambung ngagai grid kuasa karan enggau bepanggai ba generator diesel.
Ku iya, lapan rumah panjai ti apin nerima bekal kuasa karan ba Bukit Limau enggau Sungai Lamah seraya lapan da di Sungai Peking.
“Sida madah ke Sarawak Energy Berhad bekaul pengawa nyambung ungkup semua 16 rumah panjai nya disadang tembu ujung taun tu.
“Lebuh projek tu tembu, semua rumah panjai di DUN Marudi deka ngasai bekal kuasa karan 24 jam,” ku iya lebuh dirandau Unit Komunikasi Awam Sarawak (UKAS) di Miri, kena Hari Tiga.
Datuk Dr Penguang mega madah, penanggul laun nyambung bekal kuasa karan ke rumah panjai nya bepun ari pengawa nyambung tali ari grid besai ke rumah panjai nya.
Ba pekara sama, empat rumah panjai di Long Teran udah nerima bekal kuasa karan sebedau Pengerami Gawai Dayak, seraya Rumah Kara di Sungai Nat mega mujur disambung bekal kuasa karan empai lama.
Nangkan nya, Datuk Dr Penguang madah, bemacham projek pemansang bukai di Marudi mega ngemantup ati.
“Projek jalai nitih standard Opis Kereja Raya (JKR) R5 ari Marudi ke Miri diatu tembu tumu ari taga ti ditetap.
“Seraya, projek nyeruri jalai ari Lapok ke Simpang Long Jegan sereta Jalai Long Lama ke Ulu Baram ngagai standard JKR R1 mega benung chakah dipejalai lalu ditaga tembu tengan taun 2028,” ku iya.
Pia mega, ku iya, sekeda projek pemansang bukai benung ba mayuh renggat dipejalai nyengkaum ngaga Tebing Ai baru dipejalai Opis Parit enggau Entali Ai (DID) enggau Kaunsil Pelilih Marudi (MDM), projek nyeruri jalai ke Tinjar Hilir, projek bekal ai ari Opis Bekal Ai Menua Pesisir (JBALB), projek ngaga Balai Komuniti di Lapok, Tamu Mayuhguna di Beluru sereta Opis Pelilih Beluru.
Ku iya, pejalai projek nya mandangka pengeran Perintah Sarawak negap pemansang menua pesisir sereta nambah perengkaguna enggau pengelantang rayat ba Marudi enggau ngelingi endur nya. – EDISI UKAS
