DEBAK: Lima rumah panjai ba Kunsil Nengeri (DUN) Bukit Saban nerima mayuh agih belanja ti dikemendar Sapit Premier Sarawak, Datuk Amar Douglas Uggah Embas serimbai program Ngabang Gawai dia kena Hari Tiga.

Penemuai hari kedua serimbai Gawai Dayak nya ngaul Rumah Panjai Bangkit Rembai Baru, Rumah Panjai Suri Tengah, Rumah Panjai Menyalin Baru, Rumah Panjai Babu Kerangan enggau Rumah Panjai Inar.

Ba penemuai nya, Datuk Amar Douglas Uggah ti mega Kaban Kunsil Nengeri (ADUN) Bukit Saban ngemendar agih belanja sepenyampau RM10,000 ngagai Komiti Pemansang enggau Pengelikun Genturung Pendiau (JKKK) ungkup tetiap rumah panjai ti dilawa seraya Gerempung Indu tetiap rumah panjai mega nerima agih belanja RM5,000 kelai sukung ngagai tuai rumah Ngabang Gawai tu.

Iya mega ngemendar bantu nengah Program Nyeruri Rumah Rayat Seranta Sarawak (PPRMS) sepenyampau RM5,000 ungkup tiap ruang bilik ba Rumah Panjai Bangkit Rembai Baru enggau Rumah Panjai Suri Tengah ungkup tuju nyeruri rumah.

Ba Rumah Panjai Suri Tengah, agih belanja tambah sepenyampau RM20,000 dikemendar dikena nyeruri sistem parit ke pengelantang peranak.

Nangkan nya, peranak Rumah Panjai Menyalin Baru nerima agih belanja sepenyampau RM5,000 ungkup tiap 25 ruang bilik dikena nyeruri rumah nengah Agensi Pemansang Bagi Menua Betong (BDDA).

Ba Rumah Panjai Babu Kerangan, iya mega ngemendar agih belanja RM50,000 dikena ngaga stor Gerempung Indu ti deka dikena nyadi endur nyimpan kereban enggau barang komuniti.

Maya bejaku, Datuk Amar Douglas Uggah nyemetak madah ke pengeran terus bekerejasama enggau Kaban Parlimen Betong, Dato Dr Richard Rapu nentuka pemansang enggau pengelantang rayat di Bukit Saban terus diperati.

Ku iya, Perintah Sarawak naka ulih berundingka bemacham inisiatif nambah tikas sosioekonomi rayat nyengkaum nengah sektor betanam betupi ti ulih nambah penatai pemisi peranak menua pesisir.

Iya mega meransang komuniti menua ngena peluang ekonomi ti disedia perintah kelimpah terus nyukung agenda pemansang ti dipejalai dia.

Nambah ke nya, Datuk Amar Douglas Uggah ngarap rebak biak terus nyaga enggau nyagu pesaka budaya komuniti Iban ti nyadi identiti sereta ngemegah komuniti nya.

Iya mega muji raban nembiak di Bukit Saban ti agi ngemeran seni asal baka Ngajat taja napi arus pemansang moden enggau teknologi.

Dulu ari nya, iya begulai enggau bini, Datin Amar Dato Doreen Mayang, Sekretari Politik Premier Sarawak Roseline Mapong sereta Tuai Raban Indu PBB Pampang N.37 Bukit Saban Natasha Nasa Uggah mega bejadi Pengerami Ngiling Bidai di Rumah Panjai Babu Kerangan. - EDISI UKAS