MERADONG: Gawai Antu ukai semina adat tradisyen, tang mega pesaka budaya komuniti Dayak ti mandangka basa ngagai diri sebilik ti udah lesi sereta ngenang reti enggau adat asal ti ditampung ari serak siti ngagai serak siti.

Kaban Kunsil Nengeri (ADUN) Meradong, Datuk Ding Kuong Hiing madah, pengawa meruan ngatur Gawai Antu beguna amat nentuka identiti budaya komuniti Dayak terus dijaga ba arus pemansang enggau ubah jeman.

Ku iya, kerejasama rebak biak ngemujur adat nya kelai positif pesaka budaya komuniti Dayak agi diterima enggau dikenang rebak pewaris dudi hari.

“Aku berasai gaga meda rebak biak ransing nampung adat Gawai Antu.

“Tu mandangka pesaka budaya kitai agi entap enggau terus ditan komuniti kelebih agi raban nembiak,” ku iya.

Iya madah munyi nya lebuh ngulu Program Gawai Antu ti diatur di Rumah Panjai Sungai Mador, Sungai Baron enggau Sungai Kesa, kena Hari Tiga.

Datuk Ding mega madah, Gawai Antu ukai semina nyadi pelasar ngenang enggau meri basa ngagai sida sebilik ti udah lesi tang mega nyempil kaul diri sebilik sereta ngempuru kaban belayan ti datai ari mayuh endur.

Ba pekara bukai, iya ngarap rayat terus meri sukung ngagai Perintah Sarawak ti diiring Gabungan Parti Sarawak (GPS) nentuka mayuh agenda pemansang ti dilanggur ulih dipejalai belama.

Ku iya, perintah nengeri naka ulih nampung inisiatif mai pemansang ti inklusif enggau meruan kelebih agi ba sukut infrastruktur, perengkaguna mensia mayuh sereta ngubah tikas idup komuniti menua pesisir. - EDISI UKAS