SRI AMAN: Pengawa bekenaka teknologi moden ba sektor betanam betupi lebih agi bumai padi ngambi asil bisi kualiti agi enggau ulih nyungkak penatai pemisi orang bumai.

Kaban Kunsil Nengeri (ADUN) Bukit Begunan, Datuk Mong Dagang madah, orang bumai patut meda pengawa betanam betupi ukai semina aktiviti ngidupka diri aja, tang siti pengawa dagang ke ulih mansang.

Iya nerang, Perintah Sarawak ransing meri sukung nengah program latih, bantu input enggau akses makit.

“Pemadu beguna, pengawa bekenaka sistem digital baka E-Tani dikena ngemuntangka pengawa ngaul makit, ngempung data enggau komunikasyen entara orang bumai enggau agensi perintah,” ku iya.

Iya nyebut jaku nya lebuh bejadika Kus In-Situ Diseminasi Teknologi Bumai Padi di Rumah Gendi, Sungai Semilang, Tanjung Bijat ditu, Hari Dua.

Iya mega meransang rebak biak ngaul diri ba pengawa betanam betupi laban nya bisi pengulih besai ba pemansang ekonomi menua pesisir.

Program diatur Opis Betanam Betupi Pelilih Sri Aman enggau kerejasama Palan Latih Betanam Betupi (PLP) Nanga Kesit nya digulu 70 penyereta.

Sekumbang kus dua hari nya, bala penyereta diberi penemu ba mayuh pekara ngaul teknologi bumaipadi nyengkaum ngelala varieti padi baru, nagang penyakit enggau indu utai, tanah, teknik chemai enggau nanam sereta ngetau nyengkaum pengudah ngetau padi.

Tuju program nya nambah penemu enggau pengelandik bala penyereta ba teknologi betanam betupi moden, kelimpah nerang bekaul pengawa mansut enggau makit dikena mantu nambah penatai pemisi orang bumai enggau pekebun. -EDISI UKAS