BUDAPEST: Sarawak majak ngenegapka agenda pemansang kandang menua utara ari berati ke pengawa pemadu manah ngatur logistik enggau rentayan begulai Hungary nyadi malin ba perambu pemansang kandang menua utara nengeri tu manggai 2035.

Sapit Premier Sarawak, Datuk Amar Awang Tengah Ali Hasan ngetuai ked elegit datai ari bala pegawai kanan perintah, tuai agensi enggau konsultan ke ngauk diri ba pengawa nyendiaka Pelin Lokal Limbang-Lawas 2035 ngatur penemuai gawa ke Palan Logistik Entara Mod Budapest (BILK), entara hab besai kargo rel enggau logistik di Eropah Tengah.

Ku iya, tuju penemuai nya ngiri peneleba enggau mereti ke model operasyen logistik begulai ke dikena di BILK, lebih agi ba pengawa ngatur kargo rel, operasyen terminal, gudang, penyeraris logistik enggau pengelikun.

“Kami tekait ati meda baka ni siti palan logistik begulai baka BILK ngempung pengangkut rel, jala alun, gudang, ngidar, ngatur kargo, operasyen terminal, proses kastam sereta kaul sektor peribit ba siti ekosistem ke sikar,” ku iya kena Hari Dua.

Iya madah, peneleba enggau pengawa pemadu manah dipelajar ari penemuai gawa nya chukup setipak enggau pengawa ngenegapka infrastruktur logistik Sarawak, nyengkaum penyangkai kapal, padang bilun, genturung industri, pinta penama entara menua enggau rentayan pengangkut darat bagi dikena nyukung ekonomi timpuh panjai tumbuh.

Ku iya, sistem logistik ke sikar nyadi penyungkak transformasyen ekonomi Sarawak, lebih agi matak pemeranak puku strategik dalam sektor semikonduktor, teknologi singka miga, kilang maju enggau industri berega tinggi.

Datuk Amar Awang Tengah nerang, Sarawak diatu chakah bejalaika Strategi Pemansang Pengudah COVID-19 (PCDS) 2030 ke meri perati ngagai ekonomi meruan tumbuh nengah pemansang industri, kuasa ulih dikena baru, pendigitalan enggau inovasyen.

Iya mega madah, pengelebih Sarawak dalam sektor kuasa ulih dikena baru nengah pemansut hidroelektrik sereta meranak puku ba kuasa solar, biojisim enggau hidrogen terus ngentapka penudukn negeri nyadi hab kuasa beresi serantau.

“Tu meri pengelebih strategik ngagai Sarawak matak pengawa meranak puku gadung, nyukung pemansang industri enggau ngenegapka pangku pengawa nengeri nyadi ekonomi dudi hari ke ulih besemekih ba rantau ASEAN,” ku iya.

Iya mega madah, asil ari penemuai gawa nya deka dikena ba pengawa nyendiaka Pelin Lokal Limbang-Lawas 2035 ke meri perati ngagai pengawa ngenegapka perengkaguna logistik, nambah rentayan pengangkut, dagang ngilah entara menua enggau pemansang genturung industri ba kandang menua utara Sarawak.

Ku iya, kaul ke ditanggam nengah penemuai nya mega bisi pengulih ngerandang peluang kerejasama enggau besilih penemu pakar entara Sarawak enggau Hungary ngemansangka ekosistem logistik ke ulih besemekih, bisi kaul enggau meruan.-EDISI UKAS