SERIAN: Bagi Menua Serian datai ba jerita baru administrasyen lebuh Mackos Sibong rasmi mangku penuduk Residen Bagi Menua Serian ke baru ba Pengawa Nyerah Pangku Pengawa, Ngenang Jasa enggau Ngelalu Residen Bagi Menua Serian di Dewan Panggah, Palan Administraysen Perintah Sarawak Bagi Menua Serian, Hari Lima.

Pengawa nya dipenyadika Sapit Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri (ADUN) Kedup, Datuk Martin Ben.

Sama datai, Kaban Parlimen Serian, Dato Sri Dr Richard Riot Jaem, ADUN Tebedu Dr Simon Sinang Bada, ADUN Bukit Semuja John Ilus, ex-Residen Bagi Menua Serian Caroline Cleophas Joseph, Sapit Residen Bagi Menua Serian Abdul Khalid Manap sereta Pegawai Tadbir Khas Agensi Penyeraris Pemansang Greater Kuching (GKCDA), Datuk Ik Pahon Joyik.

Lebuh terubah bejaku ba mua mayuh, Mackos madah kediri ransing nampung pengawa pemansang ti udah dirandang Caroline enggau meri perati ngagai pemansang fizikal, rama enggau ekonomi peranak di Bagi Menua Serian.

Ku iya, kerejasama rat entara agensi perintah, bala tuai komuniti enggau rayat nyadi pugu t idea nentuka servis ti sikar sereta pejalai agenda pemansang ulih diadu nemban.

“Aku ngarap ke ulih nampung agenda transformasyen ti udah dipunka Caroline, kelebih agi ba sukut pemansang fizikal, rama enggau ekonomi peranak di Bagi Menua Serian.

“Kerejasama enggau semangat gawa siti tim beguna endar nentuka rayat bulih pemaik ari pemansang ti dilanggur perintah,” ku iya.

Mackos ke ngembuan peneleba lebih 20 taun ba Servis Tadbir Sarawak kala gawa nyadi Pegawai Tadbir Pelilih Mit, Pegawai Pelilih, Sapit Residen sereta di Unit Perambu Ekonomi Sarawak.

Peneleba gawa ba menua ulu baka Kapit, Marudi, Baram enggau Long Lama mega ngasuh iya mereti ke peminta rayat sereta pemar pemansang menua pesisir.

Iya mega meransang semua tuai opis, staf perintah enggau tuai komuniti ngambi besaup gawa ngemujurka juluk pemansang Sarawak nyengkaum agenda ekonomi digital, ekonomi gadung enggau pemansang penau.

Seraya Caroline lebuh bejaku meri terima kasih ke peluang gawa pengelama empat taun di Bagi Menua Serian lalu madah ke timpuh nya nyadi peneleba ti chukup berega.

Iya ke deka ngepunka pengawa baru ba Opis Menteri Pelajar, Inovasyen enggau Pemansang Penau (MEITD) madah, belidar gawa nya endang utai ke suah nyadi ba servis perintah lalu peluang terus gawa ke pemansang ti bebida.

Ku iya, mayuh pemar nyengkaum penusah bah sereta bekal ai enggau kuasa karan tejanggal mujur diputar nengah kerejasama rat entara agensi perintah, bala tuai komuniti enggau rayat.

Iya mega meri terima kasih ngagai semua pengari rayat, tuai opis, tuai raban bansa enggau tuai komuniti (KMKK), gerempung ukai dikuasa perintah (NGO) sereta raban gawa Opis Residen enggau Pelilih ti seruran meri sukung sekumbang iya gawa. -EDISI UKAS