Pemansang AI & Energi Matak Perati Pengari Dagang UK Ke ASEAN
KUCHING: Pemansang deras Sarawak ba 'artificial intelligence' (AI), energi enggau pemansang ekonomi matak perati Pengari Dagang United Kingdom (UK) Ke ASEAN.
Betuaika delegit nya, Kaban Parlimen United Kingdom ke mega Pengari Dagang UK ke ASEAN, Naz Shah madah, Kuching nyadi menua keterubah dilawa iya serimbai penemuai keterubah ke Malaysia alai penatai ba Sarawak udah meri iya peragam ke chukup manah.
"Aku tekait ati meda pemansang teknologi, pemansang AI, langgur energi, iringtuai enggau juluk ati besai Sarawak.
"Pemanah menua ke dikembaun nengeri tu chukup ngalitka ati lalu pia mega rayat ti kemerah lalu aku ngarap Sarawak meruan nempa pemujur ba semua pelin pemansang," pia ku iya.
Iya bejaku munyi nya ba aum media sepengudah betuaika penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Dua.
Kelimpah ari nya, siku ari delegit nya, Muddassar Ahmed madah, penemuai basa nya bepun ari pemujur nanggam Sempekat Pemereti Ati (MoU) di Manchester empai lama tu tadi.
Iya madah, tuju penemuai sida deka berandauka pekara bekaul MoU nya kelimpah deka nemu silik agi pemansang di Sarawak nyengkaum ba teknologi AI enggau sektor energi.
"Penemuai basa kami tu diatur nangkan penemuai basa Premier Sarawak ke Manchester ti bela ngaul raban pegawai enggau kaban parlimen British.
"Maya nya kami udah nyain MoU, lalu sehari tu kami berandau enggau Premier Sarawak senentang MoU nya.
"Randau kami lebih agi bekaul pemansang ke ditempa Sarawak ba bidang AI kelimpah pemujur ke bukai nengeri tu ba sektor energi," ku iya madah.
Kelimpah ari nya, iya madahka Datuk Patinggi Abang Zohari siku tuai ti ngembuan timpai runding jauh ke semampai meransang pengerembai pengelandik enggau inovasyen.
Iya enda nyalam, Premier Sarawak siku ari tuai dunya ti ngembuan pengelebih kala ditemu iya sekumbang ke megai macham pengawa betikas antarabansa.
"Aku kala betemu enggau mayuh tuai dunya, tang iya siku ari tuai ti pemadu ngembuan pengelebih kala ditemu aku.
"Iya ransing meransang pemansang pengelandik sereta semampai berunding panjai ba pengawa ngelanggur pemansang," ku iya madah baru.-EDISI UKAS
