KUCHING: Sapit Menteri ba Opis Premier Sarawak (Pekara Korporat, Pemadah enggau Ukas) Datuk Abdullah Saidol betuaika delegit Unit Komunikasi Awam Sarawak (UKAS) ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi, Hari Empat tu tadi.
Ba penemuai basa nya, Datuk Abdullah nerangka pengawa ngatur SMeC 2026 ke dilanggur diatur kena 16 Julai tu ba Hotel Pullman, Kuching.
Konferens renggat ketiga tu berambaika jaku “Media, Trust And Governance In A Rapidly Evolving Digital World” lalu disadang deka dipenyadi Premier Sarawak ke nyadi temuai dipebasa maya nya.
SMeC 2026 deka disempulang macham program nyengkaum woksyop, forum randau, program bekunsi penemu ke digulu nembiak institusyen pelajar tinggi, raban media sereta raban profesional komunikasyen.
Nengah program nya, SMeC 2026 dikeandal ulih ngepun inovasyen, nyungkak kompetensi profesional enggau ngenegap penyulut ekosistem media sereta komunikasyen di Sarawak, lalu deka ngerembaika pengulih ba renggat serantau.
Program serak tu bela dikemujurka tiga iku panelis ti ngembuan mayuh penemu ari macham peneleba media, komunikasyen, akademik enggau industri berandauka isu bekaul media, pengandal komuniti sereta pengawa ba dunya digital ke majak mansang.
Berebak enggau nya, Datuk Abdullah bela nerangka pengawa besikap komiti pengatur townhall serimbai Pengerami Nyambut Hari Sarawak Taun 2026 alai iya nyadi Sapit Menteri pengatur Townhall nya.
Bela datai maya penemuai basa nya, Direktor Ukas Awang Putrayusrie Awang Redzuan, Sapit Direktor Ukas, Mohamed Faizal Shah Ali sereta pegawai kanan UKAS ke bukai. -EDISI UKAS
