SINGAPURA: Sarawak benung ngatur pun penatai ai nyadi aset strategik ke ulih nyungkak pemansang industri, ekonomi gadung enggau meranak puku dudi hari, senutuk enggau juluk ati nengeri deka nyadi menua bepenatai pemisi besai ngelawa taun 2030.

Menteri Utiliti enggau Telekomunikasyen Sarawak, Dato Sri Julaihi Narawi madah, sektor ai diatu enda baka suba tang nyadi pugu nyukung agenda transformasyen ekonomi nengeri nengah Pelin Pemansang Udah COVID-19 2030 (PCDS 2030).

Iya madah, Sarawak bisi mayuh sungai alai ai endang chukup dikena ngaduka pemansang ekonomi timpuh panjai.

"Ai ukai semina isu rampa menua. Tang diatu nyadi isu ekonomi, isu strategik lalu majak nyadi isu geopolitik.

"Taja Sarawak ngembuan pun penatai ai ke mayuh, tang kitai agi betapi enggau baka ni chara kitai ngatur, nyaga, ngemansang sereta ngena manah ai ungkup pengelantang rebak dudi," pia ku iya.

Iya madah munyi nya maya ngenataika jaku berambaika Sarawak’s Water Future: Policy Direction, Industrial Growth and Collaboration Opportunities semasa sesi SWA Regional Water Outlook: Malaysia serimbai Singapore International Water Week 2026 di Marina Bay Sands ditu, Hari Dua tu tadi.

Dato Sri Julaihi mega madah, bekal ai ke chukup nyadi pekara ke beguna dikena nyukung pemansang industri, idar energi, pengerembai ekonomi digital enggau matak pemeranak puku baru ke Sarawak.

Ku iya, seraya Sarawak ransing ngenegap pengulih nyadi hub energi ulih dikena baru, ekonomi hidrogen, industri gadung, kilang maju enggau palan data serantau, pengawa nguna infrastruktur ai ke sikar sereta meruan majak nambah.

"Semua sektor tu begunaka sektor ai ti engkeman.

"Perintah Sarawak beratika pengawa ngenegap sektor ai nengah polisi ti komprehensif, meranak puku ba infrastruktur, nyungkak tikas pemanah institusyen enggau inovasyen teknologi," ku iya madah baru.

Kelimpah ari nya, iya mega madah, Sarawak chakah nentuka selampur Sarawak deka bisi ai beresi manggai taun 2030.

Ku iya, naka ke diatu, bungkur bekal ai nengeri udah datai 86.1 peratus lalu ba menua pesisir naka 71.9 peratus.

Dikena napi peminta dudi hari, iya madah, Sarawak benung ngaga Pelin Besai Bekal Ai enggau Sistem Grid Ai Sarawak ke nyengkaum pengawa ngaga paip baru urung 2,800 kilometer pemanjai enggau ngemanahka 21 loji ai besai di selampur nengeri.

Kelimpah ari nya, bisi 18 Loji Meresi Ai udah dikena mutar isu suntuk bekal ai ba sekeda endur.

Ba menua pesisir ti bepenanggul disambung sistem grid, insiatif Bekal Ai Alternatif Sarawak (SAWAS) udah digaga ungkup urung 2,600 pintu bilik ba 79 genturung pendiau enggau rumah panjai lalu 1,300 agi genturung pendiau disadang bela nerima pemansang nya nangkan tu.

Bekaul pekara digital, Dato Sri Julaihi madah, teknologi pintar deka beguna dikena nempa pemansang sektor ai nengeri dudi hari.

"Industri ai dudi hari ila deka bepanggai ba sistem matau, analitik perambu, automasyen, 'artificial intelligence' (AI) enggau pengawa ngatur aset pintar.

"Teknologi tu deka nyaup nyungkak pengulih pengawa, ngurang isu lenyau bekal ai, ngemuntang pengawa ngadu sereta ngenataika servis pemadu manah ngagai mensia mayuh," pia ku iya.

Beduduk ari nya, Sarawak ku iya, ngelaluka kerejasama ari perintah, operator ai, industri, penyendia teknologi, institusyen wang enggau organisasyen pemansik ba bidang inovasyen, pemansang pengelandik sereta ke bukai.

Ba jaku ke penudi, Dato Sri Julaihi ngelaluka komuniti industri ai antarabansa ulih datai ngulu Borneo International Water & Wastewater Exhibition and Conference (BIWWEC) 2026 ke deka diatur di Kuching kena 15 ngagai 17 Julai tu sebedau Sarawak nyadi tuai rumah ngatur IWA World Water Congress & Exhibition 2028.-EDISI UKAS