KAPIT: Sepenyampau 250 penerima ari komuniti seranta bisi nerima bantu pemakai pemun nengah Program PETRONAS Nyungkak Pengidup Gawai 2026 diatur di Rumah Bundong, Bukit Goram, kena Hari Empat.

Menteri Kereja Raya ke mega Kaban Parlimen Kapit, Dato’ Sri Alexander Nanta Linggi madah, program nya ngayanka pengeran semua raban ngintu pengelantang rayat, lebih agi ba menua pesisir.

“Program baka tu chukup besai reti laban ukai semina mantu ngelempung tating belanja raban ti beguna bantu aja, tang narak semangat segulai sejalai, penyerakup engau penyiru dalam komuniti,” ku iya ba pengawa bejadi program nya.

Iya nerang, pengerami Gawai Dayak diintu ukai semina pengerami makai selamat aja, tang lambang pesaka budaya, identiti sereta penyerakup rayat Sarawak ke patut dijaga enggau ditampung ngagai rebak dudi.

Iya mega madah, kerejasama rat entara perintah, kompeni korporat enggau komuniti menua nyadi kunchi nentuka pemansang ti inklusif enggau meruan ulih diasai serap komuniti.

Program diatur PETRONAS enggau kerejasama Opis Pelilih Kapit nya mega pengawa nyua bantu pemakai ngagai penerima ke udah dikelala nengah Sistem e-Kasih.

Ba pengawa ke sama, bela diatur pengawa nyua chek Program Mesra Rakyat (MRP) penyampau RM30,000 ngagai Rumah Bundong dikena nangkup peminta enggau pemansang komuniti menua nya.

Sama datai, Menijar Besai Kanan Kaul Mensia Mayuh PETRONAS Khairuddin Mohd Jaafar, Sekretari Politik Menteri Kerja Raya Malaysia Datuk Alvin Runggah Jimbun, ex- Sekretari Politik Menteri Kereja Raya Malaysia Ambrose Abong Bugek, Menijar Besai PETRONAS Sarawak Norazibah Md Rabu, Menijar Besai Kanan Direktor Pengawa enggau Tuai Pegawai Eksekutif Kumpulan Syarikat Malaysia LNG Abang Jimmy Abang Mordian sereta Tuai Rumah Bundong Tajok. -EDISI UKAS