JERMAN: Kerejasama strategik entara ASEAN enggau Kesatuan Eropah (EU), lebih agi nengah Sarawak, ulih meri empas besai ba pemansang inovasyen, nerima teknologi sereta ekonomi meruan tumbuh.

Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel madah, Sarawak diatu benung ngaduka transformasyen nuju ekonomi berega tinggi nengah pemansang strategik ba sektor besai.

“Tu nyengkaum ekonomi digital, ‘artificial intelligent’ (AI), Nangkap, Ngena enggau Nyimpan Karbon (CCUS) sereta kuasa ulih dikena baru,” ku iya.

Iya nyebut jaku nya ba Sesyen Besilih Penemu Pakar Renggat Tinggi enggau Randau entara Malaysia enggau EU bekaul Standard Kedaulatan Digital enggau ‘Artificial Intelligent’ (AI) ari baruh Dialog ASEAN-EU diatur di Berlin, Jerman, Hari Dua.

Dulu ari nya, Direktor Pengari Nengeri Schleswig-Holstein ngagai Perintan Besai Jerman, Udo Bunnagel lebuh bejaku madah ke transformasyen deras dunya ari sistem lama ngena mesin taip enggau dokumen fizikal ngagai jeman digital disungkak teknologi remang.

Ku iya, AI meri peluang signifikan ba atur pengawa perintah ari ngemuntangka pengawa, nambah penyikar enggau servis perintah.

Taja pia, iya mega madah ke pemesai guna nyagu kedaulatan digital, begunaka kerejasama strategik dikena ngemansangka penau AI ke dipechaya enggau inklusif.

Sesyen nya ngempuru bala pengari perintah, raban akademik enggau pemekuh industri ungkup berandauka atur gawa AI dudi hari, strategi kedaulatan digital sereta peluang kerejasama entara Asia enggau Eropah ngemansangka ekosistem AI ulih dipechaya, likun enggau meruan.

Randau nya mega nyerungkai kerejasama nyengkaum chara begulai Asia enggau Eropah ba strategi kedaulatan digital enggau AI, pemansang hidrogen, infrastruktur palan data ke meruan enggau bisi tanggungpengawa ngagai rampa menua, numbuh Hab AI Agentik sereta kerejasama ba pansik, inovasyen enggau polisi.

Program nya mega nyadi pelasar beguna dikena negapka pengeran semua raban ba pemansang AI ti bisi tanggungpengawa sereta nambah kerejasama antarabansa dikena nempa rampa digital global dudi hari.

Sama datai, Sapit Tuai Direktor Opis Menteri Polisi Digital, Opis Menteri Pekara Digital enggau Moden Nengeri Jerman, Frank Kruger, Kaunselor Kedutaan Malaysia di Berlin, Rozaime Mohamed Desa, Presiden ASEAN Business Club, Tan Sri Dr Munir Majid, Menijar Besai Sarawak Multimedia Authority, Dato Dr Anderson Tiong, Tuai Pegawai Eksekutif Sarawak Information Systems Sdn Bhd (SAINS), Busiai Seman sereta Tuai Pegawai Eksekutif Sarawak Artificial Intelligence Centre Sdn Bhd, Profesor Dr Patrick Then.-EDISI UKAS