KAPIT: Semua orang gawa perintah Sarawak diperansang seruran nyukung bala tuai perintah nengeri dikena nentuka tetiap polisi enggau mayuh inisiatif diperambu Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ulih dipenyadi enggau manah ke pengelantang rayat.

Sekretari Perintah Sarawak, Datuk Amar Mohamad Abu Bakar Marzuki madah, orang gawa perintah, bala tuai raban bansa enggau raban kabinet nengeri patut selubang penemu enggau gawa nyadi siti tim maya bealaika pengawa diri.

"Premier Sarawak kitai bejalaika mayuh inisiatif, mayuh udah pengawa dikereja iya. Lalu kami nyadi orang tig awa ba opis perintah patut seruran nyukung iya, sama gawa berati peminta rayat.

“Tu dikena nentuka sebarang pengawa ke udah dikereja, sebarang pengawa ke udah diperambu bala tuai politik kitai ulih diadu enggau manah,” ku iya bejaku ba mua mayuh rambau Pejalai Gawa Program Sarawakku Sayang (SKS) Ke Sitak Kapit di Rumah Rose, Nanga Sebatu kena Hari Empat.

Iya nerang, program ngundang rayat baka nya meri peluang ngagai orang gawa perintah nemu pengelemi, pengurang enggau pekara ke patut ditambah ba sistem ngenataika servis ngagai rayat.

Ku iya, tuju program SKS nyempil kaul perintah enggau rayat nengah penerang ke terang agi bekaul polisi perintah sereta program ke diatur.

Pengawa nya mega ku iya, rayat ulih ngulihka penerang silik terus ari bala tuai opis tauka pengari tuai opis bekaul mayuh inisiatif ke bisi baka pelajar pechuma, bantu pengelantang sereta peminta bantu pelajar.

Ku Datuk Amar Mohamad Abu Bakar, iya endang sengaja mai bala tuai opis nepan perau ngelawa menua nya ngambi bala pegawai nya meda empu utai ke nyata nyadi sereta mereti ke pengasai ati rayat ba menua pesisir.

“Aku empu mega asal ari menua. Aku nemu agi mayuh pengelemi. Mayuh pengawa udah dipejalaika perintah dikena mantu rayat.

“Lebuh kitai datai ngundang baka tu, kitai nemu dini pengelemi kitai, nama ke kurang, nama ke patut ditambah,” ku iya.

Ngenang bekaul perambu pemansang fizikal, iya madah ke mayuh pemansang deka datai ba menua nya nyengkaum projek jalai alun enggau ngaga jematan ke deka nyambung menu aba tanah seberai.

Sama datai, Sapit Sekretari Perintah Sarawak (Operasyen) Datu Hii Chang Kee, Sapit Sekretari Perintah Sarawak (Administrasyen) Datu Felicia Tan Ya Hua, Residen Bagi Menua Kapit Elvis Didit, Residen Bagi Menua Sibu Superi Awang Said sereta bala tuai opis enggau agensi bukai.- EDISI UKAS