PAC Sarawak Matau Projek Strategik Jalai Akses Tekat Hidro Baleh
KAPIT: Komiti Akaun Perintah Sarawak (PAC) ngatur pengawa matau pejalai projek pemansang strategik nengeri ari ngelawa taba Projek Jalai Akses Tekat Hidro Baleh di Bagi Menua Kapit kena Hari Tiga.
Tuju pengawa nya betuai ke Chairman PAC Sarawak, Dato Razaili Gapor nya nyerenih pejalai projek nentuka digaga nitih skop, taga enggau perambu ditetap, lalu nyamin belanja perintah dikena manah, lurus enggau bisi akauntabiliti.
Ba pejalai nya, raban PAC Sarawak diberi penerang bekaul status projek ke diatu ari Penulung Injinia Bagi Menua, Opis Kereja Raya (JKR) Bagi Menua Kapit, Ir. Ts. Christopher Donovan Durin Ajoi.
Penerang nya mungkur pejalai projek, pengawa fizikal, kelimpah pemar teknikal enggau operasyen ke ditapi nentuka projek infrastruktur strategik ulih tembu nitih taga.
Raban PAC mega ngatur randau enggau agensi ngadu projek ungkup penerang enggau timbal penemu bekaul pejalai projek, nyengkaum pengawa nyeraris dipejalai nentuka tetiap renggat projek lanchar.
Pengawa nya ngayanka PAC Sarawak seruran ransing ngaduka atur pengawa enggau akauntabiliti projek pemansang nengeri, kelimpah tetiap projek dipelanja perintah meri pemaik ngagai rayat enggau nyukung agenda pemansang Sarawak.
Sama datai bala kaban PAC Sarawak Dato Mohd Chee Kadir, Dato Ir. Lo Khere Chiang, Dato Rolland Duat Jubin, See Chee How enggau Wilson Nyabong Ijang.
Sekretari Mendam Opis Menteri Infrastruktur enggau Pemansang Penyangkai Kapal (MIPD), Datu Chiew Chee Yau, Direktor Kereja Raya Sarawak, Datu Dr. Cassidy Morris, pengari Regional Corridor Development Authority (RECODA), bala kaban Ex-Officio PAC Sarawak, pengari Opis Audit Menua sereta Sekretari PAC Sarawak, Nur Azhar Bujang sama datai.-EDISI UKAS
