MIRI: Pengerami Ngiling Bidai Gawai Dayak DUN Lambir nyadi pelasar beguna dikena negutka penyerakup rayat pupu bansa sereta nyukung agenda nengeri ke inklusif enggau meruan.
Sapit Premier Sarawak, Datuk Amar Douglas Uggah Embas madah, Perintah Sarawak deka majak ransing gawa nentuka pemansang diasai semua rayat nadai ngira raban bansa, pengarap enggau menua.
Ku iya, pengelantang rayat ke nyadi identiti Sarawak nya pun penegap enggau pemujur ekonomi nengeri asil perambu strategik enggau tuai ke jauh tinjau penemu.
“Perintah nengeri diatu ba penuduk belanja ke entap, lalu mayuh projek pemansang lebih agi ari sukut infrastruktur, pelajar, pengerai enggau perengkaguna pemun baka bekal ai enggau kuasa karan ulih dipejalai,” ku iya.
Iya nyebut jaku nya nengah teks jaku dibacha Sapit Menteri ba Opis Premier Sarawak (Pengereja Kasar, Imigresen enggau Matau Projek), Datuk Gerawat Gala diatur di Miri, kena Hari Tiga.
Ngenang pemansang ba sitak DUN Lambir, iya madah ke bisi 52 projek jalai alun beungkus RM17 juta sereta enam projek jematan mit beungkus RM1.8 juta udah digaga dikena nambah perengkaguna enggau pengelikun peranak.
Kelimpah ari nya, bisi 54 projek ngadu ngenyit beungkus RM140.5 juta bela dikemendar di Bagi Menua Miri dikena ngadu infrastruktur jai ketegal penusah.
Pengerami nya mega richah enggau mayuh isi program main asal nyengkaum Gendang Pampat, miring, Ngajat Ngalu Ke Temuai, tanda Bidayuh enggau Ngajat Iban.
Kelimpah ari nya, pengawa nyua tepa, pekit Ratu Kebaya sereta ‘Toss’ mega ngerichah pengerami ke nyadi kelai nutup Gawai Dayak.
Sama datai, Sapit Menteri Nembiak, Lumba enggau Pemansang Orang Dagang, Datuk Dr Ripin Lamat, Residen Bagi Menua Miri Galong Luang, Temenggong Yong Vui Seng, Temenggong Elizabeth Deng sereta Sekretari Politik Premier Sarawak, Ajis Japar Labaw, Pandang Seman enggau Sharkawi Suhaili.-EDISI UKAS
