PADAWAN: Perintah Sarawak deka bejalaika Sistem Akut Puncak Borneo Renggat 2 dikena ngerembai bungkur bekal ai beresi ngagai mayuh agi endur di Pelilih Mit Padawan kelebih agi ba konstitusyen Mambong.

Sapit Menteri Pengangkut Sarawak ti mega Kaban Kunsil Nengeri (ADUN) Mambong, Datuk Dr Jerip Susil madah, projek sistem ai akut beungkus RM12.6 juta di Kampung Bengoh diatu udah meri pemaik ngagai sekeda genturung pendiau ba DUN Mambong baka Kampung Jambu enggau ngelingi endur nya ti sebedau tu suah suntuk bekal ai.

Ku iya, bekal ai nya deka terus dikemansang ngagai Kampung Petag, Kampung Sitang, Kampung Bangau sereta SK Sitang Petag nentuka mayuh agi peranak ngasai ke perengkaguna pemun nya.

“Dikena nentuka bungkur besai agi, perintah merambu bejalaika Sistem Akut Puncak Borneo Renggat 2 ti deka ditumbuh ba Kampung Sapit nyadi palan nyambung baru,” ku iya.

Iya mega madah, bekal ai ari renggat kedua udah nya deka disambung ngagai Kampung Assum enggau Kampung Parang sereta ngelingi endur nya, taja bisi pemar ari sukut tikas ai baruh ti benung diputar berenggat.

Ba pekara bukai, Datuk Dr Jerip madah ke pengawa nirika lampu jalai ari simpang Rumah Jil Puncak Borneo ke Kampung Garung udah tembu digaga seraya ungkup rentayan jalai ari Kampung Garung ke Kampung Annah Rais deka dirumban ungkup renggat nangkan tu.

Ari sukut ekonomi, iya nerang ke inisiatif pemansang begulai mega dipejalai nengah sektor dagang temuai enggau pengawa betanam betupi nyengkaum pemansang betanamka kupi di Bayur Jambu dikena nambah pun penatai pemisi komuniti menua.

“kitai deka ke pemansang tu meri empas terus ngagai penatai pemisi enggau pengelantang rayat,” ku iya.

Iya mega nyemetak madah ke kerejasama semua raban beguna endar nentuka pemansang Sarawak terus disungkak chara inklusif enggau meruan kelebih agi ba kandang menua pesisir baka Padawan. - EDISI UKAS