BINTULU: Opis Betanam Betupi Sarawak meeseti ngubah chara meri servis enggau meri perati ngagai asil ti meri empas nyata ngagai rayat, ukai semina bejalaika projek tauka ngena agih belanja.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, tiap raban opis meseti ngemeran budaya kereja nyulut nentuka tetiap program ti dilanggur nyapai tuju sereta meri pemaik ngagai pemansang sektor betanam betupi nengeri.

Ku iya, tetiap unit dalam opis mega meseti ngelala pengelemi enggau ngemanahka atur pengawa dikena nambah pemanah ngenatai servis.

Ku iya, gaya kereja baka ngelama tu enda nemban tang tetiap raban opis meseti ngembuan tanggungpengawa nangkup peminta perintah enggau rayat.

“Tiap renggat bisi pangku pengawa kediri dikena nambah enggau ngemanah naka Opis Betanam Betupi.

“Kitai bisi mayuh program enggau perambu, tang semua nya nadai reti enti puntan dipejalai lalu enda meri empas,” ku iya.

Iya madah munyi nya ba Pengerami Nangguh seminar Ngerembai enggau Negap Modal Mensia Opis Betanam Betupi Sarawak 2026, ditu kena Hari Lima.

Nangkan nya, Direktor Betanam Betupi Sarawak, Dominic Chunggat madah, seminar nya ukai semina nambah semekih raban opis, tang mega negap semangat beraban sereta nyempil kaul pangan diri.

Ku iya, seminar taun tu mega bebida nengah pengawa ngambi bagi ba aktiviti lumba dikena nempa penyebela entara pemansang profesional enggau pengelantang staf.

Iya mega madah ke seminar nya mandangka lapan pengelicha ti bekunsi penemu sereta penau ngansah pengelandik enggau semekih bala penyereta. - EDISI UKAS