Kapit Kedap Kuasa Gadung Sarawak, Pugu ‘Battery of the Region’
KAPIT: Bagi Menua Kapit ukai semina palan tekat ai hidroelekterik pemadu besai di Sarawak, tang mega nyadi kedap ngemujur juluk nengeri nyadi 'battery of the region' nengah pengawa ngasilka kuasa gadung besai.
Menteri Kereja Raya, Dato Sri Alexander Nanta Linggi madah, rayat Kapit bisi kebuah asai temegah laban sebagi ari kuasa ti nyungkak industri, ekonomi enggau pemansang Sarawak dudi hari datai ari bagi menua nya.
Ku iya, Tekat Ai Bakun, Murum enggau Baleh ukai semina projek infrastruktur tang mega nyadi lambang pengelebih Kapit negap agenda kuasa beresi enggau ekonomi gadung nengeri.
"Lebuh kitai nyebut Sarawak nya 'battery of the region', nya kebuah kitai mega mesegi ngaku Kapit nya sebagi ari komponen pemadu beguna dalam bateri nya laban ditu mih kuasa nya dipansut," ku iya.
Iya madah munyi nya lebuh Pengerami Bejadi Program Sarawakku Sayang (SKS) 2026 Bagi Menua Kapit, ditu kena Hari Enam.
Pengerami nya dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Dato Sri Alexander Nanta madah, ba taun tu, Sarawak bisi kapasiti mansutka kuasa karan sepenyampau 5,898 megawatt (MW), enggau lebih 58 peratus ari nya datai ari loji hidroelekterik di Kapit.
Ari penyampau nya, ku iya, Tekat Ai Bakun mansutka 2,520 MW, seraya Tekat Ai Bakun ngasilka 944 MW, lalu ngujungka Bagi Menua Kapit nyadi palan mansutka kuasa ulih dikena baru pemadu besai di nengeri tu.
"Selinting nya deka ditegap nengah Projek Hidroelekterik Baleh ti disadang mansutka 1,000 MW ngagai kapasiti ti bisi diatu.
"Kelimpah ari hidroelekterik, Perintah Sarawak mega merambu pemansang projek solar melepu di Tekat Ai Bakun enggau Murum sereta bejalaika projek Cascading Power Source sereta Pumped Hydro Storage di Bagi Menua Kapit dikena nyamin pengelikun enggau penegap bekal kuasa dudi hari," terang iya.
Berebak enggau nya, Kaban Parlimen Kapit nya mega madah ke Kapit nyungkak sektor kuasa nengah pemansut arang batu ari Merit Pila ti mekal nyentuk 40,000 tan metrik sebulan ke Stesyen Mansutkuasa Arang Batu Sejingkat dikena nyukung operasyen loji kapasiti 120 MW nya.
Ngenang konsep 'Kapit Division as The Green Energy Powerhouse of Sarawak', Dato Sri Alexander Nanta nyemetak madah ke nya ukai semina rambai jaku tang mega mandangka realiti Kapit nyadi palan besai mansutka kuasa gadung ti nyadi penyungkak pemansang ekonomi, pengawa meranak puku enggau pemansang meruan Sarawak.
Nambah ke nya, iya minta pemansang kuasa di Kapit disebela enggau pengawa ngerembai rentayan bekal kuasa karan grid ngagai endur ti apin ngasai ke akses kuasa karan ti entap kelebih agi ba sepanjai koridor Belaga enggau Merit.
Ku iya, komuniti ba endur ti nyadi penyungkak besai kuasa gadung nengeri mega patut ngasai ke pemaik pemansang nengah bekal kuasa karan ti meruan enggau bisi kualiti.
"Bekal kuasa karan ti entap ukai semina beguna dikena ninting hari tang mega nyadi penyungkak pelajar, dagang, pengawa meranak puku enggau ngubah tikas idup komuniti menua pesisir.
"Besai pengandal rayat ngambi endur ti nyadi penyungkak besai kuasa gadung Sarawak mega ngasai ke bekal kuasa karan ti entap enggau meruan," ku iya. - EDISI UKAS
