KAPIT: Perintah Sarawak deka bejalaika projek nyeruri 5,700 kilometer (km) jalai batang ba selampur nengeri chara berenggat dikena nambah rentayan penyambung lalu ngeranchak pemansang menua ulu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya diatu ba renggat kepenudi ungkup pengawa ngelala enggau ngerikod rentayan jalai sebedau pengawa nyeruri belabuh dipejalai berenggat berindik ari projek nya begunaka besai belanja.

“Ba Kapit aja bisi lebih 1,000 kilometer (km). Jalai batang tu deka diseruri kitai. Di Baram mega bisi lebih 2,008 km. Ke bukai iya nya di Kapit enggau Baram kelimpah di Lawas enggau Limbang sereta Sri Aman.

“Semua jalai nya bisi 5,700 km,” ku iya.

Iya madah munyi nya ba aum pemberita pengudah Pengerami Bejadi Program Sarawakku Sayang (SKS) 2026 Bagi Menua Kapit ditu, kena Hari Enam.

Sama datai, Sapit Premier Sarawak Datuk Amar Douglas Uggah Embas dan Datuk Amar Awang Tengah Ali Hasan, Menteri Kereja Raya Dato Sri Alexander Nanta Linggi, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri sereta bala Kaban Kunsil Nengeri (ADUN) Sarawak.

Ngenang pemansang Kapit, Datuk Patinggi Abang Johari madah, perintah nengeri mega merambu ngemansang mengeri nya nyadi siti mengeri meruan ti moden, berurun enggau nyaga rampa menua.

“Nya kebuah, kitai nganjung pegawai ari Kapit ke Norway. Tu juluk kitai, arap ke nyadi nyata Kapit deka nyadi mengeri nyelai, nyaga rampa menua enggau berurun nengah begunan ti nyaga pemeruan.

“Tu ti deka dikemansang kitai ungkup timpuh lima nyentuk 10 taun tu. Tang, kitai meseti neleba struktur pelin besai ungkup pemansang tu,” terang iya.

Nangkan nya, Dato Sri Alexander Nanta madah ke palan padang bilun lama Kapit mega dikelala dikemansang nyadi sebagi ari pelin pemansang mengeri nya.

“Premier Sarawak deka ngabas taba ba padang bilun lama ti deka dibantai kitai ngambi dikemansang enggau bemacham perengkaguna.

“Pia mega, dikena mutar penanggul jalai sekut di Kapit, Premier Sarawak udah ngemendar dua pakej projek beungkus RM58 juta enggau RM93 juta dikena nyeruri jalai.

“Premier Sarawak mega ngemendar agih belanja dikena nyendia perengkaguna bukai nengah URDA,” ku iya. - EDISI UKAS