VILNIUS: Sarawak terus nyingkang negap kerejasama antarabansa ba bidang artificial intellegence (AI), transfomasyen digital enggau pemansang mengeri pintar nengah penemuai teknikal sereta randau strategik begulai enggau perintah Lithuania.

Deligit Sarawak ti diulu ke Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, ngatur sekeda randau di Vilnius ngambi nyerungkai peluang kerejasama ba pemansang teknologi, pengelikun siber enggau infrastruktur digital.

Penemuai dipun enggau penemuai teknikal ke Palan Pengatur Trafik Vilnius ti ngena sistem bepelasarka AI dikena matau pejalai trafik chara jam nyata nengah kamera pintar ba simpang jalai.

Sistem nya nentuka raban bekuasa matau penanggul jalai alun sekut, penusah aksiden sereta gaya jalai manah agi lalu nambah pemanah atur trafik mengeri.

Deligit mega diberi penerang bekaul sistem matau pengangkut mensia mayuh Vilnius nentuka penanggul laun enggau isu operasyen dikelala tumu agi dikena nambah pemanah servis ngagai penguna.

Ku Dato Sri Dr Muhammad Abdullah, penerang nya meri penemu tambah ngagai inisiatif Sarawak ngerumban pengawa ngena teknologi inovatif dikena nambah pemanah servis perintah, meransang ekonomi tumbuh sereta nambah kualiti idup rayat.

Muak ke lemai, deligit Sarawak ngatur penemuai ngagai Sapit Canselor Keterubah Perintah Republik Lithuania, Justas Pankauskas di Opis Menteri Besai Lithuania.

Bela datai iya nya Duta Diplomasyen Digital enggau Teknologi Opis Menteri Luar Lithuania, Lina Viltrakienė sereta Penyanding Penemu Menteri Besai Lithuania ungkup Pengawa Meranak Puku, Vydūnas Trapinskas.

Randau nya meri perati ngagai pengulih kerejasama entara Sarawak enggau Lithuania ba bidang pemansang AI, transformasyen digital, pengelikun siber sereta infrastruktur kuasa.

Ba randau nya, deligit Sarawak mega mandangka penuduk strategik nengeri tu nyadi hab digital serantau ti bisi pengulih nyadi nalan Kedutaan Digital ungkup Serakup Eropah (EU) di rantau ti.

Justas nerima manah perambu kerejasama strategik nya lalu bekunsi peneleba Lithuania dikena ngemansang sistem grid kuasa ba selampur Serakup Eropah.

Nangkan nya, Lina madah ke Lithuania ngemeran chara AI bepuguka mensia (Human-Centric AI), ti ngemerat pengawa ngena teknologi nyadi pengenap ngagai penau mensia, ukai nyilih pangku pengawa sida.

Iya mega madah ke Lithuania bisi ati ngerembai kerejasama enggau Sarawak, kelebih agi ba bidang pengelikun siberi digital enggau teknologi singka.

Kededua raban bela bekunsi penemu bekaul pemesai guna ngena palan data AI dikena nyukung inisiatif perintah digital sereta bejalaika mayuh chara mutar teknologi dudi hari. - EDISI UKAS