KAPIT: Sarawak terus ngerumban agenda transfomasyen ekonomi nengah pengawa meri perati ngagai pemansang ekonomi gadung, kuasa ulih dikena baru, artificial intellegence (AI) sereta pemansang modal mensia nyadi penyungkak besai ngemujur juluk Strategi Pemansang Pengudah COVID-19 (PCDS) 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ubah deras landskap ekonomi global begunaka Sarawak nguing ari ekonomi bepelasarka pemansut asal ngagai ekonomi baruh karbon ti meruan agi enggau disungkak teknologi sereta inovasyen.

Ku iya, kampung diatu ukai semina nyadi pengeraja asal, tang mega bisi rega ekonomi ti tinggi ti nginsap karbon lalu nyukung dagang karbon seraris enggau chara antarabansa.

“Pemansang nyadi enggau chukup deras laban idar teknologi. Ambi ke chunto di Kapit suba bepanggai ngagai pemansut kampung lalu diatu udah berubah.

“Kebuah pia laban kampung nya aja chara kitai ngumpul karbon ti nyadi pemun ngagai dagang karbon enggau bepelasarka Sempekat Paris 2015,” ku iya.

Iya madah munyi nya ba aum pemberita pengudah bejadi Program Sarawakku Sayang (SKS) 2026 Bagi Menua Kapit ditu, kena Hari Enam.

Ngenang pasal sektor kuasa, iya madah ke randau entara Petroleum Sarawak Berhad (PETROS) enggau PETRONAS disadang nyerungkai peluang kerejasama ti ulih negap pemansang industri kuasa seraya meri pemaik ngagai pemansang ekonomi Sarawak enggau menua.

Nambah ke nya, iya madah ke Perintah Sarawak mega ngemerat pemansang modal mensia nengah pengawa bejalaika 64 program pelajar enggau latih ti nyerangkung mayuh bidang baka sains, teknologi, pengatur pengawa, pekara wang enggau psikologi.

Ku iya, ubah rama enggau gaya idup komuniti mega ngingatka pemesai guna pengereja profesional kelebih agi ba bidang psikologi.

“Tu dikena kitai nempa modal mensia landik,” terang iya baru.

Dulu ari nya, lebuh bejaku ba pengawa bejadi nya, Datuk Patinggi Abang Zohari nerang ke juluk perintah ngemansang Kapit nyadi siti mengeri meruan tauka green township.

"Menteri Kereja Raya Dato Sri Alexander Nanta Linggi deka ngulihka belanja ari Perintah Besai lalu kitai deka nyukung inisiatif tu nyengkaum ngemansang jalai ba seberai Kapit.

“Keterubah, sekali ke deka ngaga jematan dulu ari Mengeri Kapit ke seberai sungai lalu kitai deka ngemansang mengeri ti nyaga pemeruan rampa menua iya nya green township, engka ti keterubah ditu,” terang iya.

Ba pengerami sebaka, iya mega bejadi simbolik pengawa nyuaka Bantu Barang Diguna Pemun Sarawak (SKAS) enggau Skim Pelajar Tinggi Pechuma Sarawak (FTES).

Tembu pengerami nya, iya ngatur pejalai ngabas seraya gawa ke Sekula Primari (SK) Kampung Baru sebedau ngulu taklimat Kaunsil Pemansang Koridor Kandang Menua (RECODA) ba pandang bilun lama Kapit.

Bela datai, dua Sapit Premier Sarawak Datuk Amar Douglas Uggah Embas enggau Datuk Amar Awang Tengah Ali Hasan, Menteri Kereja Raya Dato Sri Alexander Nanta Linggi, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri sereta Kaban Kunsil Nengeri (ADUN) Sarawak.-EDISI UKAS