Raja Muda, Raja Puan Muda Perlis Ngelawa Muzium Pesaka Industri Limbungan Brooke
KUCHING: Duli Yang Teramat Mulia (DYTM) Raja Muda Perlis Tuanku Syed Faizuddin Putra Ibni Tuanku Syed Sirajuddin Jamalullail sereta Raja Puan Muda Perlis Tuanku Dr Hajjah Lailatul Shahreen Akashah Khalil ngatur pejalai ngelawa Muzium Pesaka Industri Limbungan Brooke ditu kena Hari Enam.
Dua iku melaki bini diraja nya datai ba mua muzium urung pukul 11 pagi lalu diambat Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu begulai enggau bini, Datin Rosemarie Wong sereta pegawai enggau staf Opis Muzium Sarawak.
Ba penemuai nya, seduai baginda diberi penerang bekaul sejarah penumbuh Limbungan Brooke sereta pangku pengawa ba pemansang industri maritim enggau ngaga kapal di Sarawak.
Baginda mega ngabas sekeda artifak, kereban pemandang enggau koleksyen besejarah ti dipandang ba muzium nya.
Kelimpah ngelawa muzium, seduai baginda mega ngulu enggau meda pemerindang serimbai Festival Muzik Kampung Ujan Sedunya (RWMF) 2026 di Kampung Budaya Sarawak ti diatur pengelama tiga hari, belabuh ari Hari Lima nyentuk Hari Minggu tu nyadi sebagi ari taga penemuai rasmi ke nengeri tu.
Seduai baginda mega deka mupuk pulai ke Perlis Hari Satu pengudah tembu penemuai rasmi pengelama tiga hari di Sarawak. - EDISI UKAS
