KUCHING: Perambu nambah penuduk Kunsil Nengeri (DUN) Sarawak disadang enda ulih dibantai ba aum Parlimen taun tu berindik ari pengawa ngaga adan baru ti agi ba renggat dipejalai Komiti Besai Pengawa Bepilih (SPR).

Sapit Menteri Besai, Datuk Amar Fadillah Yusof madah, nitih ke penerang ti diterima SPR, sekeda atur enggau prosedur meseti diputar sebedau perambu nya ulih dibai ke Parlimen.

“Pemadu tumu, aku ngasai ke sida ulih mandang (perambu) ngagai mensia mayuh ke alai pengudah pengawa mandang, SPR deka meri awak ngagai mensia mayuh mantah enggau ke bukai.

“Nya kebuah, pengawa enggau prosedur tu aja engka enda ulih nangkup timpuh ungkup taun tu lalu engka taun baru ulih dibantai,” ku iya.

Iya madah munyi nya lebuh dirandau pemberita pengudah Pengawa Nyua Insentif Nembiak Nyulut SPM Parlimen Petra Jaya di Sekolah Menengah Sains Kuching Utara, Petra Jaya, kena Hari Minggu.

Ngenang Geran Khas nengah Perkara 112D Perlembagaan Persekutuan, Datuk Amar Fadillah nerang ke penuduk Sabah enggau Sarawak nya bebida laban Sabah bisi agih belanja khas nengah Konstistusyen ti netapka 40 peratus asil nengeri dipulai ngagai Sabah.

Ba Sarawak, ku iya, pekara nya diatu diperunding ngagai Perkara 112D Perlembagaan Persekutuan ti nyerangkung formula bayar Geran Khas.

"Ba Sarawak, kitai mayuh berati ke artikel 112D ke alai ti diulih kitai iya nya belanja interim sepenyampau RM600 juta.

“Pekara ti diperambu Sarawak iya nya formula ngambi lebuh kitai ngatur pengawa nyeraris, nya begunaka siti formula tauka polisi.

“Nya alai, pekara tu agi ba renggat diperunding lalu nganti pemutus ari Opis Menteri Pekara Wang,” ku iya. -EDISI UKAS

Pemberita : Ahmad Daniel Faiz