SERIAN: Penegap sereta polisi pemansang ti konsisten nyadi entara kebuah besai nentuka Sarawak bejalaika bemacham inisiatif strategik dikena nyamin pengelantang rayat ba selampur nengeri.
Menteri ba Opis Premier Sarawak, Dato Sri John Sikie Tayai madah, nengah iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sarawak mujur nempa pekara wang ti entap lalu nentuka mayuh program pemansang enggau pengelantang rayat dipejalai.
“Nengah iring Datuk Patinggi Abang Zohari, Sarawak udah mujur bulih penatai pemisi ninting taun nengeri nyentuk manggai RM14 bilion lalu nentuka nengeri tu bejalaika mayuh program ke pengelantang rayat.
“Tu nyengkaum bejalaika projek infrastruktur besai, ngagihka bantu wang nengah Bantu Barang Diguna Pemun Sarawak (SKAS), nyendia pelajar tinggi pechuma ungkup anak Sarawak nengah Skim Pelajar Tinggi Pechuma Sarawak (FTES) enggau mayuh agi.
Iya madah munyi nya ba Pengerami Makai Lemai Solidariti Makai Selamat enggau Ngiling Tikai di Dewan Chung Hua Serian, ditu kena Hari Enam.
Nambah ke nya, ku iya, pengawa bejalaika mayuh inisiatif pemansang nya nentuka rayat ngasai ke tikas idup nambah sereta peluang pemansang ti mayuh agi kelebih agi di kandang menua pesisir enggau menua ulu.
Iya mega ngemerat pemesai guna tuai enggau pengari komuniti terus ngundang rayat ngambi mereti ke peminta sereta nentuka tetiap agenda pemansang ulih dipejalai nemban enggau meri pemaik ngagai semua.
Bela datai, Sapit Menteri Industri Kreatif enggau Seni Pemerindang Sarawak, Datuk Snowdan Lawan, Kaban Parlimen Sri Aman, Dato Sri Doris Sophia Brodi, Kaban Parlimen Lubok Antu, Roy Angau Gingkoi, Sekretari Politik Premier Sarawak, Susan Clement Ingun sereta Tuai Indu PRS Balai Ringin, Helen Jambai. - EDISI UKAS
